A expresidenta da Sala do Contencioso-administrativo do Tribunal Superior de Xustiza de Galicia, María Dolores Rivera Frade, será homenaxeada por amigos/as, compañeiros/as e autoridades o próximo 28 de novembro na Coruña, con motivo da súa toma de posesión como maxistrada do Tribunal Supremo.  

Rivera foi, en 2019, a primeira muller en presidir unha sala do TSXG. O pasado 16 de setembro tomou posesión ante a Sala de Goberno do alto tribunal como maxistrada da Sala Terceira, cargo para o que foi elixida polo pleno do CXPX na súa sesión do 23 de xullo. No acto, presidido pola presidenta do Tribunal Supremo e do CXPX, Isabel Perelló, Rivera foi amadriñada pola maxistrada da Sala Terceira Esperanza Córdoba.

Traxectoria profesional

Desde 1992, cando ingresou na carreira xudicial, ata o ano 2000, foi titular de xulgados de primeira instancia e instrución en Vilagarcía de Arousa e L’Hospitalet de Llobregat. Os seus seguintes destinos, entre 2000 e 2010, foron o xulgados número 1 e 2 do Contencioso-administrativo de Santiago de Compostela, desde onde pasou a ocupar unha praza na Sala do Contencioso-administrativo do TSXG, que presidiu desde 2019 ata que foi elixida, este ano, maxistrada do TS. Rivera compatibilizou o exercido da función xurisdicional coa docencia na Universidade de Santiago de Compostela. Desde 2019, dirixe o curso A protección do patrimonio histórico e a súa conexión co urbanismo, organizado polo Servizo de Formación Continua do CXPX en Santiago de Compostela.