O presidente do Tribunal Superior de Galicia, Miguel Ángel Cadenas Sobreira, destacou hoxe na apertura do ano xudicial en Galicia a independencia responsable dos xuíces. “É inherente a un Estado democrático un poder xudicial independente, que é garantía dos cidadáns”, dixo o presidente, quen tamén insistiu en que esta independencia está ligada á responsabilidade que leva. “Nun Estado de dereito, a responsabilidade xudicial configúrase como unha característica propia do estatuto do xuíz”, manifestou.

Cadenas deixou tamén constancia “da necesidade inaprazable de acometer as reformas que se veñen anunciando desde hai tempo para lograr unha Xustiza debidamente eficiente e moderna”. Concretou que esta reforma “máis ou menos integral da Administración de Xustiza” debe pasar pola “reordenación territorial, funcional e competencial”, así como por unha “planta e demarcación xudicial máis racional e eficiente, coas oportunas infraestruturas e ferramentas tecnolóxicas”.

O presidente do TSXG tamén repasou no seu discurso os principais datos da memoria xudicial do ano pasado. Puxo de relevo que os órganos xudiciais da Comunidade resolveron en 2015 case 453.000 asuntos, o que unido a que o número de causas ingresadas descendeu un 6%, permitiu que a pendencia diminuíse un 10%.

Cadenas destacou tamén a boa evolución das salas do contencioso e social do propio Tribunal Superior “ata non hai moito saturadas pola imposibilidade de eliminar unha pendencia atafegante por excesiva”. Ao finalizar o primeiro semestre do ano, período en que ingresou 1644 asuntos, a Sala do Contencioso-administrativo tiña pendentes de resolver 2622 causas, fronte ás 3158 a finais de 2015. “Cunha planta de 20 maxistrados, pódese considerar que a Sala está practicamente ao día”, indicou o presidente do alto tribunal galego.

Con respecto á Sala do Social, a pendencia o 31 de xullo era de 2780 asuntos, mes en que os maxistrados empezaron xa a resolver causas ingresadas este mesmo ano. Cadenas salientou que, atendendo á súa planta, composta por 18 maxistrados, pódese considerar tamén que a pendencia da Sala está “normalizada”, “aínda que no segundo trimestre do ano houbo un aumento na entrada de asuntos”.

O fiscal superior de Galicia, Fernando Suanzes, centrou a súa intervención en dar conta da Memoria da Fiscalía da Comunidade Autónoma, que reflicte que no ano 2015 se tramitaron en Galicia un total de 215.701 procedementos penais, un 4% menos que no ano anterior. Sobre a criminalidade, sinalou que se rexistraron 19 homicidios, dos cales 8 foron por violencia de xénero, “a maior cifra de mortes por esta causa no que levamos de século”. Por outra banda, o pasado ano baixaron un 3% os delitos incoados por tráfico de drogas, un 12% as subtraccións e un 19% os relacionados coa seguridade viaria, mentres que se incrementaron un 14% os delitos incoados por agresión sexual. En canto aos delitos de corrupción, diminuíron un 32%, cun total de 195 procedementos iniciados por esta causa e 22 sentenzas ditadas.

Fernando Suanzes tamén aproveitou a súa intervención para referirse ao proceso de implantación das novas tecnoloxías no ámbito da Xustiza, unha tarefa na que “aínda queda moito por facer” e que, ao seu xuízo, leva un considerable atraso con respecto a outras administracións. Sinalou que “o complicado mapa tecnolóxico actual fai que coexistan unha pluralidade de aplicacións xudiciais, redes e estratexias que restan funcionalidade ao sistema”, e avogou por “buscar con urxencia fórmulas de coordinación que faciliten os fluxos de información entre as distintas aplicacións de xestión procesual”.