EAEko Auzitegi Nagusiko Administrazioarekiko Auzien Salak zuzenbidearen kontrakotzat jo eta baliogabetu egin du Euskadiko Kirol Portuak (EKT) erakunde publikoaren zuzendaritzaren 2021eko azaroaren 11ko ebazpena, Donostiako kirol-dartsenan aisia-ontzientzako amarralekuak emateko deialdia ebazten zuena. 

EAEko Auzitegi Nagusiak bi ebazpen eman ditu, eta, horietan, bi partikularrek jarritako apelazio-errekurtsoa baietsi du, honako hau ere adierazi duelarik: "ez da zilegi esleipena erabakitzen den ebazpenean bertan joko-arauak aldatzea". 

Demandatzaileek alegatu zuten errekurritutako ebazpenak urratu egiten zituela Eusko Jaurlaritzaren Aginduan –hain zuzen ere aisiako ontzien titularrei amarralekuak emateko prozedura eta horiek erabiltzeko emakiden araubidea arautzekoan– lekuak esleitzeko ezarritako irizpideak. 

Argudiatzen zuten agindu horren 5.4 artikuluak aukera ematen diola Administrazioari erabilgarri dauden amarralekuen kopurua eta ezaugarriak modu arrazoituan aldatzeko, murrizteko edo handitzeko, baina aldaketa horiek ezin direla «zuzenean esleipen-ebazpenean» egin. 

Halaber, errekurtsoetako batean adierazi zen ez zela errespetatu ontziak zeuzkaten eskatzaileen lehentasuna, eta "izena eta matrikula jasota ez zituzten" ontziei eman zitzaizkiela plazak (matrikularik gabeko 10 ontzi identifikatu baitzituzten), eta, horrez gain, plazen neurrietara hobekien egokitzen ziren ontziei ere ez zitzaiela lehentasunik eman. 

Alegazio horien aurrean, EAEko Auzitegi Nagusiak epaietako batean (321/2025 zenbakikoa) erantzun zuen «deigarria dela» Eusko Jaurlaritzaren zerbitzu juridikoaren «erabateko isiltasuna» argudiatutako aurkaratze-egitate eta -arrazoi gehienekiko», eta «arriskua bazegoela Salak hori egiaztatutzat jotzeko, aurka egin ez zaiolako». 

EAEko Auzitegi Nagusiak gaineratu duenez, "ikuspegi juridiko hutsetik, alderdi demandatuak (Eusko Jaurlaritzak) dio aginduaren 5.4 artikuluak aukera ematen diola Administrazioari amarralekuen kopurua eta horien ezaugarriak aldatzeko". EAEko ANk gogorarazten duenez, apelatzaileak ez du hori ukatzen. 

Kasu honetan, EAEko ANk zehaztu duenez, eztabaidagaia da ea "bidezkoa ote den aldaketa hori amarralekuen ebazpenean bertan egitea", eta horren gainean alderdi demandatuak (Eusko Jaurlaritza) "ez du erantzunik eman". 

EAEko Auzitegi Nagusiak dioenez, "Administrazioak ezin ditu aldaketa horiek egin amarralekuak esleitzeko ebazpenean bertan, ezustean eta gardentasun gutxirekin, interesdunei bat-bateko aldaketa horren aurrean erreakzionatzen uzten ez dielarik". 

"Administrazio-prozedura baten antolamenduan administrazio onaren, gardentasunaren eta logikaren printzipioak esan nahi du, Administrazioak joko-arauak aldatu nahi izanez gero (deitutako plazen kopurua eta ezaugarriak), aurretiaz egin beharra duela, hasierako deialdiari publikotasun berbera emanez, interesdunei bide emanez aurreikuspen berri horiek zalantzan jartzeko edota beren jokabidea horietara moldatzeko, eta bakar-bakarrik hori eta gero, ebatzi", dio EAEko ANk.  

«Ez da zilegi esleipena erabakitzen duen ebazpenean bertan joko-arauak aldatzea», laburbiltzen du EAEko nagusiak: «Administrazio-prozedura inpartzialtasunaren eta objektibotasunaren bermea da administrazio-jardunean, eta berme horrek ez du malgutzerik onartzen, eta arriskuan jartzen da honen moduko administrazio-prozedura bat onartuz gero». 

Bi ebazpenak ez dira irmoak eta Auzitegi Gorenean errekurritu daitezke.