A sección sexta da Audiencia Provincial da Coruña, con sede en Santiago de Compostela, condena a un avogado a catro anos e medio de cárcere estafar a un cliente, quen lle entregou diversas cantidades de cartos baixo a crenza de que eran necesarias para a tramitación de procedementos xudiciais relacionados coa legalización dunha propiedade familiar. O tribunal, que o considera autor dun delito de estafa agravada, tamén o multa con 6.600 euros e inhabilítao para o exercicio da profesión durante o tempo da condena. 

Ademais, imponlle outra multa de 10.800 euros por cometer un delito de quebrantamento de condena e absólveo dos delitos de apropiación indebida e deslealdade profesional. O acusado deberá devolver ao cliente os 34.650 euros estafados e indemnizalo con 20.000 euros en concepto de dano moral. 

A sala entende acreditado que o avogado, que levaba anos representando á familia en diversos procedementos, aproveitou "de forma reiterada” a súa “posición de confianza" e vulnerou os deberes deontolóxicos ao solicitar diñeiro ao seu cliente. Entre 2010 e 2015, segundo consta no fallo, reclamoulle 34.650 euros alegando falsos gastos xudiciais, cantidades que nunca se abonaron ao proceso, senón que pasaron a formar parte do seu patrimonio. 

Ademais, os maxistrados destacan que, a pesar de que o avogado fora condenado previamente por delitos similares, continuou asesorando ao cliente durante a súa inhabilitación profesional, o que constituíu un quebrantamento de condena. 

A Audiencia salienta que tanto as declaracións da vítima como da súa esposa son cribles, mentres que entenden que a versión do acusado é "contraditoria" e "incompatible coa falta de constancia documental das entregas de cartos no seu despacho". 

A sentenza non é firme, xa que pode ser recorrida ante o TSXG.