A sección quinta da Audiencia Provincial de Pontevedra, con sede en Vigo, condena a dous acusados de agredir sexualmente, de forma conxunta, a unha moza de 18 anos nun domicilio de Travesía de Vigo. O tribunal imponlle a un deles once anos e medio de cárcere, pois tamén foi considerado autor dun delito de descubrimento e revelación de segredos por gravar os feitos. No seu caso, o tribunal tivo en conta a atenuante simple de reparación parcial do dano por consignar 7.500 euros. Ao outro procesado, imponlle nove anos de prisión. Ambos deberán pagar unha indemnización conxunta á vítima de 17.000 euros.

Os maxistrados aseguran no relato de feitos probados da sentenza que a afectada coñeceu a ambos o día dos feitos, o 4 de setembro de 2022, cando tiña 18 anos, nun local do Areal ao que acudira con varias amigas. Ao pechar un dos establecementos, o grupo, incluída a vítima, decidiron continuar a festa no domicilio dun amigo dun dos procesados. Unha vez alí, segundo indican os xuíces, a moza mantivo relacións sexuais consentidas nunha das habitacións cun dos dous condenados. Cando ambos estaban no interior da dependencia, o resto de membros do grupo, a excepción do outro sospeitoso, se marcharon do domicilio tras unha discusión. Nese momento, segundo sinala o tribunal, o procesado entrou na habitación e, tanto el como o seu amigo, que xa estaba no interior, agrediron sexualmente á vítima. Os maxistrados salientan que a moza “lles pediu que parasen, pero non o fixeron”. Ademais, engaden que un deles gravou a violación co seu teléfono móbil.

A Sala destaca que chegou á conclusión de que os feitos sucederon dese modo “tras a oportuna valoración en conciencia da proba practicada no seo do xuízo oral, fundamentalmente a da vítima obxecto da agresión sexual e a que se gravou co móbil”. Ademais, tivo en conta as declaracións dos axentes que acudiron ao lugar dos feitos alertados pola nova. O tribunal tamén indica que un “elemento corroborador moi importante” do testemuño da afectada é a marca psíquica que lle deixou a agresión sexual, posta de manifesto por tres peritos. “Non se aprecian modificacións esenciais, nin contradicións relevantes nas sucesivas declaracións prestadas pola vítima, xa que sempre expuxo a mesma versión sobre como sucederon os feitos”, recalcan os xuíces na sentenza, contra a que cabe presentar recurso ante a Sala do Civil e Penal do TSXG.