Análise xurídica
Mediante a análise xurídica, incorpóranse valores ás resolucións xudiciais, o que contribúe a constituír o Fondo Documental Cendox, que é a base de datos que se ofrece no contorno restrinxido para a carreira xudicial.
A análise xurídica das resolucións comporta o fornecemento de notables valores engadidos, tales como:
- apreciación da relevancia da sentenza en base a criterios documentais normalizados
- cualificación do veredicto
- determinación da cuestión/cuestións formuladas
- resumo da resolución analizada
- clasificación conforme a Tesauro desenvolvido polo CENDOX
- establecemento de vínculos con outras fontes de información de índole xurisprudencial, lexislativa e de publicacións do Consello Xeral do Poder Xudicial.
Procédese á análise da totalidade das sentenzas do Tribunal Supremo e ao dunha selección das ditadas pola Audiencia Nacional e o resto de órganos colexiados desde o ano 2006.
A análise de sentenzas procedentes do Tribunal Supremo realízase por membros do Gabinete Técnico deste tribunal, coordinados pola súa Xefatura. As resolucións dimanantes da Audiencia Nacional e do resto de órganos colexiados son analizadas por integrantes destes tribunais o que, en todos os casos, ofrece unha excelente garantía de calidade.
En relación á normativa reguladora e selección dos analistas, ditáronse acordos expresos polo Consello Xeral do Poder Xudicial, procedendo a realizar convocatorias periódicas para a incorporación e renovación dos seus integrantes.
O Fondo Documental ofrece un pormenorizado buscador de xurisprudencia ao que se incorpora a análise de resolucións descrita, así como buscadores de lexislación consolidada coas distintas versións que a norma sufriu ao longo da súa vida. Inclúe tamén os relatorios dos cursos organizados polo CXPX e publicacións monográficas, así como circulares, instrucións e consultas emitidas pola Fiscalía Xeral do Estado desde o ano 2000. Mostra tamén unha área persoal, na que se poden gardar procuras, documentos, imprimir, enviar, etc. Así mesmo preséntanse os últimos dossieres documentais e ofrécese un buscador para acceder a todos eles.
No FD Cendox encóntrase incorporado tamén ao Fondo histórico do Tribunal Supremo, desde 1852 ata 1978.
TESAURO XURÍDICO CENDOX
Un Tesauro é unha lista controlada e estruturada de conceptos, cuxo obxecto é axudar ao usuario na recuperación da información, así como suxerirlle conceptos relacionados que expresen mellor o seu pensamento.
Desde o Centro de Documentación Xudicial elaborouse o Tesauro de Xurisprudencia que contén ao redor de 22.000 termos correspondentes a todas as ordes xurisdicionais.
Este Tesauro é unha valiosa ferramenta de organización conceptual das materias tratadas polas decisións xudiciais. Así, o uso da súa terminoloxía estándar facilita a recuperación da información, permitindo xestionar e sistematizar a inxente cantidade de resolucións do Fondo de Xurisprudencia.
Cabe salientar que se trata dunha ferramenta en constante renovación, suxeita a adicións, rectificacións e supresións de termos, modificacións en moitas ocasións suxeridas polos propios usuarios.