Introducción
Este apartado ten por finalidade difundir a actividade contractual do Consello Xeral do Poder Xudicial, asegurando a transparencia e o acceso público á información relativa á devandita actividade segundo establecen o artigo 63 da Lei 9/2017, do 8 de novembro, de contratos do sector público, pola que se traspoñen ao ordenamento xurídico español as directivas do Parlamento Europeo e do Consello 2014/23/UE e 2014/24/UE, do 26 de febreiro de 2014, e o artigo 8.1.a) da Lei 19/2013, do 9 de decembro, de Transparencia, Acceso á Información Pública e Bo Goberno.
O artigo da 639 da Lei Orgánica 6/1985, do 1 de xullo do Poder Xudicial, establece que:
- O Consello Xeral do Poder Xudicial poderá asinar os contratos que sexan precisos para o axeitado exercicio das súas atribucións, con suxeición á lexislación de contratos do sector público.
- O órgano de contratación será a Comisión Permanente, que deberá manter informado o Pleno sobre os contratos que se asinen.
A Comisión Permanente do Consello, na súa reunión do día 26 de marzo de 2014, acordou:
- Deixar sen efecto o acordo de delegación de competencias en materia de contratación tomado na reunión da Comisión Permanente do 15 de xaneiro de 2014 e publicado no Boletín Oficial do Estado número 16, de 18 de xaneiro de 2014.
- Delegar no Secretario Xeral do Consello Xeral do Poder Xudicial as funcións de órgano de contratación do Consello, a excepción dos procedementos de contratación de servizos directos á carreira xudicial de carácter tecnolóxico e os bibliográficos.
- Delegar no Director do Gabinete Técnico do Consello as funcións de órgano de contratación do Consello nos procedementos de contratación de servizos directos á carreira xudicial de carácter tecnolóxico e os bibliográficos.
Por outra banda, na súa reunión do 28 de xaneiro de 2014 a Comisión Permanente acordou delegar no Secretario Xeral a autorización dos gastos cuxo importe non exceda de 75.000 euros. Non obstante, o Secretario Xeral poderá elevar á Comisión Permanente a autorización dos mencionados gastos cando, atendendo á súa natureza, o considere oportuno.
Por último, por acordo da Secretaría Xeral do 18 de decembro de 2020 (BOE núm. 337, de 26 de decembro) estableceuse a composición da Mesa de Contratación do Consello.
Perfil de contratante
O acceso aos expedientes de contratación tramitados polo Consello mediante procedementos negociados e abertos realízase a través da Plataforma de Contratación do Sector Público, o punto único de información da contratación pública do Estado e nodo central de intercambio de información de contratación, que serve como "praza de mercado" para a concorrencia de compradores do Sector Público e licitadores (ver "Perfil de contratante").
Contratación menor
Os contratos menores poderán adxudicarse directamente a calquera empresario con capacidade de obrar e que conte coa habilitación profesional necesaria para realizar a prestación, cumprindo coas normas establecidas no artigo 118 da Lei 9/2017, do 8 de novembro, de contratos do sector público.
Considéranse contratos menores os contratos de valor estimado inferior a 40.000 euros, cando se trate de contratos de obras, ou a 15.000 euros, cando se trate de contratos de subministración ou de servizos, sen prexuízo do disposto no artigo 229 en relación coas obras, servizos e subministracións centralizados no ámbito estatal.
Nos contratos menores definidos no artigo 118 da Lei 9/2017, do 8 de novembro, de contratos do sector público, a tramitación do expediente exixirá o informe do órgano de contratación en que se motive a necesidade do contrato. Así mesmo, requirirase a aprobación do gasto e a incorporación a el da factura correspondente, que deberá reunir os requisitos que as normas de desenvolvemento desta lei establezan. No contrato menor de obras deberase engadir, ademais, o orzamento das obras, sen prexuízo de que deba existir o correspondente proxecto cando normas específicas así o requiran.
No expediente xustificarase que non se está alterando o obxecto do contrato para evitar a aplicación das regras xerais de contratación e que o contratista non subscribiu máis contratos menores que, individual ou conxuntamente, superen a cifra que consta no punto primeiro deste artigo. O órgano de contratación comprobará o cumprimento da dita regra. Quedan excluídos os supostos encadrados no artigo 168.a).2.n da Lei 9/2017, do 8 de novembro, de contratos do sector público.
Os contratos menores publicaranse na forma prevista no artigo 63.4 da Lei 9/2017, do 8 de novembro, de contratos do sector público.
Contratación centralizada de bens e servizos
Na contratación centralizada de bens e servizos o Consello Xeral do Poder Xudicial non actúa como órgano de contratación senón como mero peticionario, atendendo unicamente á recepción e pagamento dos bens ou servizos declarados de contratación centralizada que lle son fornecidos, sendo a Dirección Xeral de Racionalización e Centralización da Contratación do Ministerio de Facenda quen, consonte coa petición formulada polo Consello, formaliza os contratos directamente cos adxudicatarios dos acordos marco asinados por esta.
Contratos, prórrogas e modificados formalizados
Este apartado contén copia dos contratos formalizados no exercicio actual polo Consello Xeral do Poder Xudicial e das formalizacións de prórrogas e modificados de contratos autorizados polo órgano de contratación durante o exercicio actual. Non se inclúe a contratación menor, que non é obxecto de formalización. Os contratos inclúen os pregos de cláusulas administrativas particulares e de prescricións técnicas polos que se rexeu o correspondente procedemento.
Actas da Mesa de Contratación
Baixo este título recóllese copia das actas das reunións que celebra a Mesa de Contratación do Consello, cuxa última composición é a recollida no Acordo do 25 setembro de 2023, da Secretaría Xeral do Consello Xeral do Poder Xudicial (BOE no 237, do 4 de outubro de 2023). As actas reprodúcense sen incluír os anexos.