A composición e competencias da Comisión de Informática Xudicial veñen reguladas no Regulamento 1/2005, dos aspectos accesorios das actuacións xudiciais, aprobado polo acordo do 15 de setembro de 2005, do Pleno do Consello Xeral do Poder Xudicial, en concreto nos seus artigos 98 a 102.

A Comisión de Informática Xudicial está composta polo Vogal Delegado para a Oficina Xudicial e a Informática, que a preside, e por catro maxistrados, un por cada orde xurisdicional, designados polo Pleno do Consello. Está asistida polo Director do Gabinete Técnico e polos Letrados que sexan adscritos a esta. Poderá convocar e poderán asistir ás súas sesións os representantes das Administracións Públicas con competencias sobre os medios materiais ao servizo da Administración de Xustiza.

A Comisión de Informática Xudicial ten expresamente encomendada a elevación de propostas ao Pleno do Consello Xeral do Poder Xudicial para a aprobación dos programas e aplicacións informáticos previstos no artigo 230.5 da Lei Orgánica do Poder Xudicial e debe establecer as características que han de reunir os sistemas informáticos que se utilicen na Administración de Xustiza. Para iso, delibera e resolve sobre as propostas de aprobación de programas e aplicacións que lle eleven as Salas de Goberno dos Tribunais Superiores de Xustiza, da Audiencia Nacional e do Tribunal Supremo, que veñen acompañadas do informe dos órganos con competencias sobre os medios materiais ao servizo da Administración de Xustiza, ou sobre as propostas presentadas polas Administracións Públicas con competencias sobre os medios materiais ao servizo da Administración de Xustiza, que veñen acompañadas do informe da Sala de Goberno do Tribunal Superior de Xustiza, da Audiencia Nacional ou do Tribunal Supremo.

Así mesmo, intercambia información cos órganos do Ministerio de Xustiza e do Ministerio Fiscal, así como cos das Comunidades Autónomas con competencias sobre os medios materiais ao servizo da Administración de Xustiza, para o mellor desenvolvemento dos plans de informatización da Administración de Xustiza.