Organización do Servizo de Inspección

O Servizo de Inspección leva a cabo, baixo a dependencia da Comisión Permanente, as funcións de comprobación e control do funcionamento dos servizos da Administración de Xustiza aos que se refire o apartado 1.8ª do artigo 560 da Lei Orgánica do Poder Xudicial, mediante a realización das actuacións e visitas que sexan acordadas polo Consello, todo iso sen prexuízo da competencia dos órganos de goberno dos Tribunais e en coordinación con estes (arts. 560 e 615 da LOPX).

O Xefe do Servizo é nomeado polo Pleno do Consello Xeral do Poder Xudicial coincidindo o seu mandato co do Consello que o nomeou.

A Xefatura do Servizo está integrada por un maxistrado/a adxunto/a e un letrado adscrito que, xunto co/a Xefe/a do Servizo, conforman a Unidade inspectora Central. 

O Servizo de Inspección está organizado en cinco unidades inspectoras, todas elas compostas por un ou varios  inspectores delegados e un ou varios letrados. As unidades están organizadas por ordes xurisdicionais e son: a unidade civil, penal, social, contencioso-administrativa e unidade mixta que abrangue os xulgados de familia, capacidade das persoas, menores e vixilancia penal.

A Sección de Estatística está integrada no Servizo de Inspección, sendo o seu labor a tramitación, ordenación e explotación dos boletíns estatísticos dos órganos xudiciais.

Funcións atribuídas ao Servizo de Inspección

1. Coñecemento e fornecemento de información sobre a situación de xulgados e tribunais. Con esta finalidade existen varias aplicacións informáticas que reúnen a información dispoñible en relación cos órganos xudiciais así como os datos profesionais dos membros da carreira xudicial. A partir dos datos obtidos, o Servizo de Inspección elabora a información sobre a situación de cada órgano xurisdicional ou sobre un  conxunto destes, así como sobre a xestión e rendemento dos seus titulares.
2. Control da actividade de xulgados e tribunais. A función de control está orientada a verificar o grao de cumprimento dos estándares preestablecidos no funcionamento dos órganos xurisdicionais, así como a situación real dos órganos e a detección de posibles desviacións.
3. Prevención de disfuncións nos órganos xudiciais. Realízanse propostas de plans de actuación concretos a través do coñecemento adquirido.
4. Apoio á mellora da xestión de xulgados e tribunais. Unha vez efectuado o control, e a resultas do mesmo, procédese a realizar unha análise dos aspectos máis relevantes en relación coa organización e funcionamento do órgano xurisdicional así como sobre as causas que explican a situación de cada un deles, coa proposta de melloras que se consideren necesarias.
5. Proposición á organización xudicial, así como aos entes públicos e aos demais operadores xurídicos, da posta en marcha de medidas e a incorporación de pautas e elementos de perfeccionamento, en relación coa xestión e mellora da calidade do servizo público da Administración de Xustiza.

Actividades do Servizo de Inspección

1. Visitas presenciais de inspección. Por parte das unidades inspectoras realízanse visitas ordinarias e extraordinarias aos órganos xudiciais. As ordinarias teñen como finalidade o coñecemento xeral e detallado do estado de cada órgano inspeccionado, as extraordinarias o coñecemento de situacións concretas cando a Comisión Permanente considera necesaria a súa realización. Das visitas de inspección levántase unha acta detallada do resultado da inspección na que se propoñen as medidas que se considere necesario adoptar, dirixidas tanto ao órgano inspeccionado como á Xefatura do Servizo, a outros organismos ou a entidades de calquera natureza.
2. Inspección virtual. Con periodicidade semestral realízase unha exhaustiva comprobación da situación dos órganos xudiciais, baseada nos datos da sección de estatística, nos contidos no resto de aplicacións informáticas do Servizo de Inspección e na información obtida dos órganos xudiciais, no seu caso. No informe derivado desta inspección fanse constar os órganos que presentan disfuncións e realízanse as propostas internas e externas necesarias para a súa mellora.
3. Informes. O Servizo de Inspección elabora todo tipo de informes que lle son requiridos pola Comisión Permanente, o Promotor da Acción Disciplinaria e os distintos Servizos e Seccións do Consello Xeral do Poder Xudicial (medidas de reforzo, concursos de traslados, compatibilidades, licenzas etc.). Así mesmo realiza informes para órganos e entidades externas cando lle son requiridos.
4. Control do funcionamento dos órganos xudiciais.