A provisión dos postos de traballo dos órganos técnicos do Consello, agás as excepcións previstas na Lei Orgánica do Poder Xudicial ou, se for o caso, nos Regulamentos de desenvolvemento desta, realízase mediante concurso de méritos.

No Consello Xeral do Poder Xudicial existirá un Corpo de Letrados. O ingreso neste realizarase mediante un proceso selectivo no que se garantan os principios de mérito e capacidade. O equipo do Corpo de Letrados do Consello Xeral do Poder Xudicial estará integrado por Letrados de carácter permanente e Letrados de carácter temporal. O número de prazas do equipo de Letrados, tanto as de carácter permanente coma as de carácter temporal, determinarase regulamentariamente polo Pleno do Consello.

Os Letrados do Consello Xeral do Poder Xudicial poderán desempeñar as súas funcións nos distintos órganos do Consello consonte o establecido na Lei Orgánica e no Regulamento de Organización e Funcionamento do Consello Xeral do Poder Xudicial.

Nos órganos técnicos tamén poderán prestar servizos membros das carreiras xudicial e fiscal, do Corpo de Secretarios Xudiciais, do Corpo de Xestión Procesual e Administrativa, do Corpo de Tramitación Procesual e Administrativa e do Corpo de Auxilio Xudicial ao servizo da Administración de Xustiza, así como funcionarios das Administracións Públicas, no número que fixen as correspondentes relacións de postos de traballo.

Aqueles que obtivesen postos de nivel superior previo concurso de méritos, serán nomeados polo Pleno do Consello Xeral do Poder Xudicial por un período de dous anos, prorrogable por períodos anuais cun máximo de prestación de servizos de dez anos e serán declarados, se é o caso, en situación de servizos especiais na súa Administración de orixe.

Cando se trate da prestación de servizos nos restantes postos dos órganos técnicos do Consello, os funcionarios que os desempeñen consideraranse en servizo activo nos seus corpos de orixe. Durante o tempo que permanezan ocupando un posto de traballo no Consello, estarán sometidos ao Regulamento de Persoal do CXPX.

O Regulamento de Organización e Funcionamento do Consello Xeral do Poder Xudicial poderá prever que determinados postos de traballo de carácter técnico, por requirir unha preparación específica e distinta da xurídica, sexan provistos mediante concurso de méritos entre funcionarios daqueles corpos que en cada caso estableza o citado Regulamento. En calquera caso, os postos de nivel superior nos órganos técnicos do Consello Xeral do Poder Xudicial só poderán ser ocupados polos que posúan a titulación requirida para pertencer a un Corpo incluído no Subgrupo A1 das distintas Administracións Públicas.