O obxectivo deste portal estatístico é ofrecer a información estatística dispoñible sobre os distintos aspectos da Administración de Xustiza. Durante moitos anos esta información foi escasa e dispersa, sendo o seu núcleo principal a derivada dos boletíns estatísticos trimestrais recollidos polo Consello Xeral do Poder Xudicial, e algunhas estatísticas relacionadas cos órganos ou con rexistros xudiciais realizadas polo Instituto Nacional de Estatística. Sendo aínda moitas as carencias, nos últimos anos a situación mellorou sensiblemente a medida que se foron desenvolvendo os Plans Nacionais da Estatística Xudicial elaborados pola Comisión Nacional de Estatística Xudicial.

Desde o portal pódese acceder á información organizada en grupos temáticos. Tamén se pode acceder de maneira inmediata aos distintos estudos e informes estatísticos elaborados polo Consello Xeral do Poder Xudicial; ao Sistema de Información Socioeconómica das demarcacións xudiciais, que recolle información demográfica e económica a nivel de cada unha das divisións do territorio que utiliza a Administración de Xustiza, e á Base de datos da Estatística xudicial en PC AXIS, que permite acceder a información bastante detallada para cada un dos órganos xudiciais españois, desde o ano 1995 ata o último publicado (catro meses despois de pecharse o ano). Tamén se presenta a información ordenada segundo a estrutura do Plan Nacional de Estatística Xudicial vixente, de forma que poida ser seguida a execución do mesmo.

Os informes anuais e trimestrais do Consello Xeral do poder Xudicial publícanse segundo un calendario preestablecido que está presentado de maneira destacada no Portal. Tamén se ofrece aos usuarios unha caixa de correo que pode servir de canle de comunicación coa Sección de Estatística do Consello, co obxecto de solicitar aclaracións, realizar suxestións, ou solicitar información.

O Portal inclúe un apartado de estatística xudicial histórica, con datos procedentes dos Anuarios do Instituto Nacional de Estatística ou da súa antecesora comisión Estatística do Reino, que se remontan a 1858.