Bizkaiko Probintzia Auzitegiko Lehen atalak 4 urteko espetxe-zigorra ezarri dio prokuradore bati, Banku Berregituraketatik datozen Aktiboak Kudeatzeko SAk (Sareb) epaitegi batean kontsignatu zituen 500.000 euroz jabetzeagatik, hartzekodunen konkurtsoaren esparruan.

Epaian frogatutzat jotako egitateetan jasotzen denez, prokuradore horrek Sareb ordezkatzen zuen Bilboko merkataritza-arloko epaitegi batean bideratutako hartzekodunen konkurtsoan, eta Bankuen Berregituraketatik datozen Aktiboak Kudeatzeko Sozietateak 500.000 euro gordailutu zituen, higiezinen gune baten enkantean parte hartzeko.

2016ko ekainaren 2an erabaki zen Sarebi itzultzea enkantean parte hartzeko egindako gordailua, eta egun horretan bertan eman zen haren aldeko ordaintze-manamendua, 500.000 euroko zenbatekoarekin. Ekainaren 10ean eman zitzaion manamendu hori akusatuari, hartzekodunaren prokuradore gisa.

Akusatuak ez zion Sarebi jakinarazi manamendua eman zitzaionik, eta ekainaren 14an Bilboko banketxe batera jo zuen, eta, “zilegitasunik gabe aberasteko asmoz” sozietate horren ahalordedun gisa, "zenbateko osoa kobratu zuen, banku-transferentzia bidez" bere titulartasuneko "kontu batean, eta zenbateko horretaz jabetu eta bere ondarean sartu zuen".

Auzitegiak zehazten du akusatuak egitateak aitortu zituela ahozko ikustaldian, eta agiri-frogak berretsi egin zuela akusazio-idazkietan jasotako ez-zilegia.

Defentsak aringarriak eskatu zituen arrazoi psikikoengatik eta aitorpenagatik. Bizkaiko Auzitegiak uste du ez dela egiaztatu gertakariak jazo ziren unean – 2016ko ekainaren 14a – akusatuak "buru-gaitasunak kaltetuta zituenik aringarri bat eratzeko adina".

Aitortzaren aringarria ere errefusatzen du; izan ere, prozedura judiziala haren aurka bideratzen zela jakin ondoren gertatu zen, eta, gainera, egitateak aitortzea ez zen funtsezkoa izan; izan ere, egitate horiek «argi eta garbi islatzen ziren auzian zegoen dokumentazioan».

Espetxe-zigorraz gain, Bizkaiko Auzitegiak 12 hilabeteko isuna ezartzen dio, eguneko 8 eurokoa.

Epai hau ez da irmoa eta bere aurka errekurtsoa aurkez daiteke Euskal Autonomia Erkidegoko Auzitegi Nagusian.