Auzitegi Goreneko Laugarren Salara bideratzen diren kasazio-errekurtsoak formalizatzeko edo aurkezteko eta aurkaratzeko idazkien gehieneko luzerak eta betebehar estrintsekoak

1. Indarraldia.

Akordio honetan agertzen arauak «Estatuko Aldizkari Ofizialean» argitaratu eta handik hogei egunetik aurrera aurkezten diren idazki prozesalei aplikatuko zaizkie.

2. Gehieneko luzera.

Kasazio-errekurtsoak eta doktrina bateratzeko kasazio-errekurtsoak formalizatzeko, aurkezteko edo aurkaratzeko idazkiek gehienez 50.000 karaktere edukiko dituzte, zuriuneak ere kontuan hartuta, alegia, A-4 tamainako 25 folio edo orrialderi dagokiena.

Gehieneko luzera horretan, idazki prozesalek izan dezaketen edozein eduki mota aintzat hartzen da.

Idazkiaren amaieran, zenbat karaktere dituen egiaztatu beharko du sinatzaileetako batek. Halakorik balitz, aurreikusitako gehieneko luzera gainditu izana justifikatu egin beharko du, salbuespenezko inguruabar bereziak eta berariazkoak daudenean, behar bezala azalduta.

3. Formatua.

Testugintzarako, «Times New Roman» letra-tipoa erabiliko da, 12 puntuko tamainarekin testuan, eta 10 puntukoarekin orri-oineko oharretan edo erantsita doazen arauen edo epai-paragrafoen hitzez hitzeko transkripzioan.

Testuaren lerroartea 1,5ekoa izango da.

Marjina horizontalak eta bertikalak (orrialdearen goiko, beheko, ezkerreko eta eskuineko marjinak) 2,5 cm-koak izango dira.

Dokumentuak ez du edukiko irakurtzea zailtzen duen marrarik edo bestelako elementurik.

Orrialde guztiak zenbakituta egongo dira goranzko hurrenkeran, goiko eskuineko izkinan, 1 zenbakitik hasita.

Errekurtsoa formalizatu, aurkeztu edo aurkaratzeko idazkiak bete egin beharko ditu 1065/2015 Errege Dekretuak, azaroaren 27koak, Justizia Ministerioaren lurralde-eremuko Justizia Administrazioaren komunikazio elektronikoei buruzkoak eta LexNET sistema arautzen duenak, eta Justizia Administrazioaren Idazkaritza Nagusiaren 2015eko abenduaren 15eko Ebazpenak, 1065/2015 Errege Dekretuak, azaroaren 27koak, Justizia Ministerioaren lurralde-eremuko Justizia Administrazioaren komunikazio elektronikoei buruzkoak eta LexNET sistema arautzen duenak aurreikusitako inprimaki normalizatuaren eredua onesten duenak, edo aplikagarriak diren haien ondorengo beste edozein arauk, ezartzen dituen eskakizunak.

Kasazio-errekurtso bateratzailea aurkezteko idazkiarekin, aldez aurretik aurkeztu ez bada, aurkako epaiaren edo epaien ekarpen ziurtatua egin ahal izango da, errekurtsoa jartzeko epea amaitzen den egunean hura irmoa dela egiaztatuz, edo aurretiaz aurkeztu den epaia epe horren barruan irmoa dela adierazten duen ziurtagiria aurkezten delarik. Baldin eta errekurtso-egileak ez badu dagokion epean aurkezten epaiaren eta haren irmotasunaren ziurtagiria, ofizioz erreklamatuko du Salako idazkaritzak.

4. Kasazio-errekurtsoaren idazkiaren aurretik jarri beharreko karatula.

Formalizatu, aurkeztu edo aurkaratzeko idazkiaren aurretik, karatula bat jarri beharko da, errekurtsoaren funtsezko datuak azaldu behar dituena.

Karatulak ez du errekurtso-idazkiaren edukia ordezten, ezta zabaltzen ere.

Dokumentu hori Botere Judizialaren Kontseilu Nagusiaren webgunean egongo da eskuragarri, eta bertatik deskargatu ahalko da, bete eta kasuan kasuko prozesu-idazkiarekin batera txertatu ahal izateko.

Karatularen edukia honako hau izango da:

A) Errekurtsoa formalizatu edo aurkezteko idazkia

a) Identifikazioa:

i) Errekurtsogilearen edo errekurtsogileen izen-abizenak edo sozietate-izena, bat baino gehiago direnean alfabetoaren arabera ordenatuta (lehen abizenaz), eta NAN, pasaporte, AIZ (atzerritarren kasuan) edo IFZ (pertsona juridikoen kasuan) zenbakia.

ii) Halakorik denean, ordezkari modura parte hartzen duen Prokuradorearen edo Gizarte-graduatuaren izena, abizenak eta elkargokide-zenbakia.

iii) Letraduaren edo letraduen izen-abizenak eta elkargokide-zenbakia.

b) Kasazio-errekurtso arrunta edo doktrina bateratzekoa den azalpena.

c) Errekurritutako ebazpena.

d) Urgentziaz edo lehentasunez izapidetu beharreko errekurtsoa ote den adierazpena, eta urgentzia edo lehentasunaren oinarria.

e) Errekurtsoaren edo aurkaratzearen zioak, zenbakituta.

e.1) Doktrina bateratzeko kasazio-errekurtsoetan, zio bakoitzean honako hauek jarri behar dira:

i) Kontraste-epaia.

ii) Kontraesanaren azalpena. Gehienez ere 300 karaktere, zuriuneak barne.

iii) Zioaren oinarri den arau substantiboa edo prozesala.

iv) Egindako arau-haustearen laburpena; gehienez ere 300 karaktere, zuriuneak barne.

v) Arau prozesal bat haustean oinarritzen bada zioa: arau-haustea egozten zaion ebazpen edo jarduketa prozesalaren identifikazioa, data adieraziz eta, hala badagokio, jarduketen deskribatzailearen edo folioaren zenbakia.

vi) Arrazoitzat aipatzen den kasazio-intereseko kasu objektiboaren identifikazioa (Lan-arloko Jurisdikzioa arautzen duen Legearen 219.1 artikulua). Gehienez ere 300 karaktere, zuriuneak barne.

vii) Auziaren xedea galdatzen duten erabakiak (gehienez ere 300 karaktere, zuriuneak barne).

e.2) Kasazio-errekurtso arruntetan, zio bakoitzean honako hauek azaldu behar dute:

i) Arau substantiboa edo prozesala, zeina haustean oinarritzen baita zioa.

ii) Egindako arau-haustearen laburpena; gehienez ere 300 karaktere, zuriuneak barne.

iii) Arau prozesal bat haustean oinarritzen bada zioa: arau-haustea egozten zaion ebazpen edo jarduketa prozesalaren identifikazioa, data adieraziz eta, hala badagokio, jarduketen folioaren edo deskribatzailearen zenbakia eta/edo grabazioaren minutua, bai eta arau-haustetzat salatu den egintza prozesala (idazkia, ebazpena, aurretiazko entzunaldia, ikustaldia, agerraldia, eta abar) ere.

Zuzendu daitekeen arau-hauste prozesala balitz, jarraibide berberak emango dira zuzentzea eskatu den egintza prozesalari buruz.

iv) Auziaren xedea galdatzen duten erabakiak (gehienez ere 300 karaktere, zuriuneak barne).

f) Halakorik balitz, aurreikusitako gehienezko luzera gainditu izanaren justifikazioa (gehienez ere 300 karaktere, zuriuneak barne).

B) Errekurtsoa aurkaratzeko idazkia.

a) Identifikazioa:

i) Errekurtsogilearen edo errekurtsogileen izen-abizenak edo sozietate-izena, alfabetoaren arabera ordenatuta (lehen abizenaz), eta NAN, pasaporte, AIZ (atzerritarren kasuan) edo IFZ (pertsona juridikoen kasuan) zenbakia.

ii) Halakorik denean, prokuradorearen izen-abizenak eta elkargokide-zenbakia, edo ordezkari den gizarte-graduatuarena.

iii) Letraduaren/letraduen izen-abizenak eta elkargokide-zenbakia.

b) Aurkaratzeko arrazoiak.

c) Galdatutako erabakia (gehienez ere 300 karaktere, zuriuneak barne).

d) Halakorik balitz, aurreikusitako gehieneko luzera gainditu izanaren justifikazioa (gehienez ere 300 karaktere, zuriuneak barne).