Donostiako Zigor-arloko 2 zk.ko Epaitegiak bi urte, sei hilabete eta egun bateko espetxe-zigorra ezarri dio gizon bati, alkoholaren eraginpean gidatzeagatik eta gurpil-aulkian zihoan gizon bat zebra-bide batean harrapatu eta hiltzeagatik.

Epaitegiak ibilgailu motordunarekin egindako zuhurtziagabekeria larriaren ondoriozko giza hilketaren delitu baten egiletzat jo du, eta edari alkoholdunen eraginpean gidatzearen beste delitu baten egiletzat ere bai.

Gertaera 2022ko apirilaren 15ean, arratsaldeko lehen orduan izan zen, Ibarran (Gipuzkoa). Auzipetuak gizon bat harrapatu zuen bere ibilgailuarekin, une horretan gurpil-aulkian oinezkoen pasabide jaso bat zeharkatzen ari zela. Hau bere aulkitik jaurti eta, burua lurraren kontra jo zuen. Minutu batzuk geroago hil egin zen.

Azaroaren 21eko epaian frogatutzat emandako gertakariek jasotzen dutenez, lehenago hartutako edari alkoholdunak edateagatik, akusatua ez zen gidatzeko gai, eta hori egiaztatu zen bertaratutako Ertzaintzako agenteek egin zioten proban.