O Tribunal Superior de Xustiza da Comunidade Valencia, ao igual que o resto dos Tribunais Superiores de Xustiza, é a máxima expresión do Poder Xudicial na comunidade autónoma e constituíuse o 23 de maio de 1989, substituíndo a Audiencia Territorial como órgano integrante da estrutura xudicial.

O TSXCV está actualmente constituído por tres salas:

A Sala do Civil e Penal.

Como sala civil, asume

• As demandas de responsabilidade civil contra o presidente e membros do Goberno Valenciano e contra os membros das Cortes Valencianas. Tamén cando estas demandas se dirixan contra todos ou a maior parte dos Maxistrados dunha Audiencia Provincial ou de calquera das súas seccións.
• Os recursos de casación e o extraordinario de revisión contra resolucións de órganos xudiciais da orde civil con sede na Comunidade Autónoma, sempre que o recurso se funde en infracción de normas do Dereito Civil Foral Valenciano.

Como sala do penal asume:

• As causas contra aforados.
• Os recursos de apelación contra as sentenzas do Tribunal do Xurado.
• A decisión das cuestións de competencia entre os distintos órganos xurisdicionais da orde penal.

A Sala do Contencioso-Administrativo

É o órgano fiscalizador das administracións públicas na Comunidade Valenciana. Resolve:

• Os recursos que se formulan contra actos e disposicións das Entidades Locais e das Administracións das Comunidades Autónomas, sempre que o seu coñecemento non estea atribuído aos Xulgados do             Contencioso-Administrativo.
• Os recursos de apelación e revisión contra sentenzas e autos ditados polos Xulgados do Contencioso-administrativo.
• Os recursos de casación para a unificación de doutrina e en interese de lei nos casos previstos na Lei reguladora da Xurisdición               Contencioso-administrativa.

A Sala do Social
Coñece sobre:

• Os procesos sobre controversias que afecten a intereses dos traballadores e empresarios no ámbito superior ao dun Xulgado do Social e non superior ao da Comunidade Autónoma.
• Os recursos contra as resolucións ditadas polos Xulgados do Social da Comunidade Autónoma.
• As cuestións de competencia que se formulen entre os distintos Xulgados do Social da Comunidade Autónoma

O alto tribunal valenciano ten a súa sede no Pazo de Xustiza, situado na Glorieta, un edificio construído no século XVIII para a Aduana de Valencia, que despois foi Real Fábrica de Tabacos. Posteriormente foi cedido ao Ministerio de Graza e Xustiza, aínda que non foi ata o século XX cando se converteu en Pazo de Xustiza. A transformación para albergar a sede da entón Audiencia Territorial, que comezou en 1914 e rematou oito anos despois, foi obra do arquitecto Vicente Rodríguez Martín.