2016ko otsailaren 17an argitaratu da Estatuko Aldizkari Ofizialean karrera judizialean gertatzen den sexu jazarpenaren, sexuagatiko jazarpenaren, bereizkeriazko jazarpenaren eta bestelako jazarpen eta indarkeria moduen aurreko jarduketa protokoloa, Botere Judizialaren Kontseilu Nagusiaren Berdintasun Batzordeak eta Karrera Judizialeko Segurtasun eta Osasun Batzorde Nazionalak batera egin dutena eta 2015eko otsailaren 17ko BJKNren Batzorde Iraunkorraren erabaki bidez onartu dena.

Protokoloan aurreikusitakoa betetze aldera eta bertan xedatutakoaren aplikazioa errazte aldera, BJKNren Berdintasun Batzordeak eta Karrera Judizialeko Segurtasun eta Osasun Batzorde Nazionalak elkarrekin prestatu dituzte protokoloa aplikatzeko gida eta Aholkulari Konfidentzialaren kargua beteko duten pertsonen izendapenari buruzko zenbait gomendio. Bi dokumentu hauek 2016ko otsailaren 25eko BJKNren Batzorde Iraunkorraren erabaki bidez onartu dira.

Karrera Judizialeko Berdintasun Planeko xedapenak garatzen dituen Protokolo hau eta bere dokumentu osagarriak onartuz, BJKNk formalki adierazi du Karrera Judizialean gertatzen diren jazarpen eta indarkeria modu guztiekiko “zero tolerantzia” politika bat ezartzeko konpromisoa, biktima eta jazarlea nortzuk diren kontuan hartu gabe eta antolaketa judizialean edozein egoera dutela ere.

Konpromiso hori ardatz hartuta, BJKNk jazarpena prebenitzeko eta desagerrarazteko kultura korporatiboa sustatuko du prestakuntzarako, informaziorako eta sentsibilizaziorako ekintzen bidez; kexa edo salaketa guztiak aztertu eta horien prozesuan bitartekari gisa jardungo du; jokabide hauek sufritu dituzten pertsonei aholkularitza eta laguntza eskainiko die beren bizitza pertsonala eta profesionala berreskura dezaten.