O 17 de febreiro de 2016 publicouse no Boletín Oficial del Estado o Protocolo de actuación contra o acoso sexual, o acoso por razón de sexo, o acoso discriminatorio e contra todas as formas de acoso e violencia na Carreira Xudicial, elaborado conxuntamente pola Comisión de Igualdade do Consello Xeral do Poder Xudicial e a Comisión Nacional de Seguridade e Saúde da Carreira Xudicial, e aprobado por acordo da Comisión Permanente do CXPX de 17 de febreiro de 2015.

Co fin de dar cumprimento ao establecido no Protocolo e facilitar a súa aplicación, a Comisión de Igualdade do CXPX e a Comisión Nacional de Seguridade e Saúde da Carreira Xudicial elaboraron conxuntamente unha Guía de aplicación do Protocolo e recomendacións sobre o nomeamento das persoas convocadas para exercer o cargo de Asesoras Confidenciais, documentos que tamén foron aprobados por acordo da Comisión Permanente do CXPX de 25 de febreiro de 2016.

Coa aprobación deste Protocolo e os seus documentos complementarios, que veñen a desenvolver as previsións contidas no Plan de Igualdade da Carreira Xudicial, o CXPX manifesta formalmente o seu compromiso de adoptar unha política de “tolerancia cero” con respecto ás manifestacións de acoso e violencia na Carreira Xudicial, sen atender a quen é a vítima ou o acosador, ou calquera que sexa a súa situación dentro da organización xudicial.

Fiel a este compromiso, o CXPX promoverá unha cultura corporativa de prevención e erradicación do acoso a través de accións formativas, informativas e de sensibilización; mediará e investigará en relación con calquera queixa ou denuncia; asesorará e prestará apoio aos que sufriron estas condutas para que recuperen o seu proxecto de vida persoal e profesional.