A Cidade da Xustiza de Vigo, que albergará todas as sedes xudiciais da urbe, foi inaugurada hoxe pola súa Maxestade o Rei, quen estivo acompañado polo presidente do Tribunal Supremo e do Consello Xeral do Poder Xudicial (CXPX), Carlos Lesmes; o presidente da Xunta de Galicia, Alfonso Rueda; e a ministra de Xustiza, Pilar Llop. Don Felipe, tras descubrir unha placa na praza que dá acceso ao edificio, realizou un percorrido polas instalacións, que teñen 44.000 metros cadrados e nas que se instalarán 38 xulgados e dúas seccións desprazadas da Audiencia Provincial de Pontevedra. Ademais, mantivo unha audiencia cos presidentes dos Tribunais Superiores de Xustiza de España, os cales celebran esta semana en Vigo as súas xornadas anuais, e un encontro de traballo cos responsables do proxecto e autoridades civís e xudiciais. Durante esta reunión, o xuíz decano de Vigo, Germán Serrano, explicou á súa Maxestade como se realizará o traslado á nova sede xudicial e que vantaxes supón con respecto ás actuais.

O presidente do Tribunal Supremo e do CXPX asegurou que é un edificio “impresionante” e “ referencial para a cidade de Vigo”. Ademais, afirmou que o inmoble “está moi por enriba da media nacional en canto a calidade” e destacou que é “o mellor” dos que ten inaugurado como presidente do TS e do CXPX. Lesmes tamén incidiu en que os equipamentos públicos están “ao servizo dos cidadáns”, polo que deu os “parabéns” aos vigueses, pois son “os destinatarios últimos” das instalacións.

En canto á renovación do CXPX, salientou que é “imprescindible” que se faga “xa”, á vez que lembrou que é “unha anomalía constitucional” o feito de que leve máis de tres anos en funcións. “Antes do verán debería facerse a renovación”, subliñou.

Ao acto tamén asistiron o presidente do Parlamento de Galicia, Miguel Ángel Santalices; o delegado do Goberno en Galicia, José Manuel Miñones; o alcalde de Vigo, Abel Caballero; e o conselleiro de Presidencia, Xustiza e Deporte da Xunta, Diego Calvo; así como o presidente do Tribunal Superior de Xustiza de Galicia, José María Gómez y Díaz-Castroverde, entre outras autoridades.

Nas obras, adxudicadas en 2016 e dirixidas polo arquitecto Alfonso Penela, investíronse máis de 40 millóns de euros. O edificio, que se comezou a construír en 1947 e que ata 2015 funcionou como Hospital Xeral, foi readaptado para converterse en sede de 38 unidades xudiciais -8 Xulgados de Instrución, 3 Xulgados do Penal, 15 Xulgados de Primeira Instancia, 7 Xulgados do Social, 2 Xulgados do Contencioso, un Xulgado do Mercantil, un Xulgado de Garda e un Xulgado de Violencia sobre a Muller-, das dúas seccións desprazas da Audiencia Provincial de Pontevedra, da Fiscalía de Área e da subdirección do Instituto de Medicina Legal de Galicia (Imelga).