A sección cuarta da Audiencia Provincial da Coruña acordou formularlle ao Tribunal Constitucional a posible inconstitucionalidade de aplicarlle ao dereito á pensión compensatoria —percibida maioritariamente por mulleres— a regra xeral de inembargabilidade de soldos e pensións do artigo 607 da Lei de axuizamento civil (LAC). Os maxistrados advirten que podería ser contrario ao dereito á tutela xudicial efectiva e ao dereito á igualdade ante a lei sen discriminación por razón de sexo. 

A Audiencia Provincial da Coruña cuestiona a constitucionalidade do artigo 607 da LAC na súa proxección sobre a execución ou o aseguramento cautelar do dereito a percibir unha pensión compensatoria por desequilibrio, xudicialmente recoñecido nunha sentenza de divorcio ou separación a favor dun dos cónxuxes fronte ao outro. “Consideramos que a norma legal é, nas expresadas circunstancias, contraria ao dereito á tutela xudicial efectiva do artigo 24 da Constitución, que abarca o dereito a que as resolucións xudiciais firmes se executen, e contraria tamén ao dereito fundamental á igualdade ante a lei, sen discriminación por razón de sexo, porque discrimina indirectamente as mulleres, ás que particularmente prexudica, negando ou restando efectividade ao dereito compensatorio que serve para paliar o desequilibrio que soportan, tras o cesamento da convivencia, por razón do rol que asumiron na repartición de tarefas propio da estrutura familiar tradicional”, indica a sala no auto. 

Os xuíces destacan na resolución que a pensión compensatoria por desequilibrio “non é unha pensión alimenticia, segundo reiteradamente declarou o Tribunal Supremo”. Ademais, recalcan que é “unha evidencia” que, na maior parte dos casos, “a acredora da pensión compensatoria tras unha sentenza de separación ou divorcio é a muller”, pois “pesa con claridade o rol que tradicionalmente se lle atribuíu á muller no matrimonio, o sacrificio das súas posibilidades de promoción laboral ou profesional en beneficio da casa, dos fillos e a familia, favorecendo con iso que o marido alcance ou consolide unha posición que, a partir da ruptura da convivencia, levará consigo en moitos casos para a muller unha deterioración da súa posición económica en contraste coa que o seu cónxuxe conserva, en relación coa que ambos viñan gozando durante o matrimonio”. A Audiencia sinala que, “nin sequera desde esta perspectiva, que invoca á igualdade de trato e de oportunidades entre mulleres e homes como principio informador do ordenamento xurídico para integrarse e observarse na interpretación e aplicación das normas xurídicas” é posible “equiparar pensión de alimentos e pensión compensatoria para permitir a superación dos límites do artigo 607”. Por iso, decretou a suspensión do recurso de apelación que examina relativo a unha pensión compensatoria, para formularlle ao Tribunal Constitucional a cuestión de inconstitucionalidade. Contra o auto non cabe presentar recurso.