A sección segunda da Audiencia Provincial de Ourense rexeitou proceder á revisión da pena de nove anos de cárcere imposta a un agresor sexual debido á entrada en vigor da nova lei. O tribunal, que se pronuncia nun auto sobre a cuestión exposta polo condenado, que solicitaba que se lle rebaixase a pena nun ano de prisión, explica que coa LO 10/2022 os feitos deberían ser cualificados con arranxo ao artigo 181.3, é dicir, actos de contido sexual cun menor de 16 anos, pois a vítima contaba con 15 anos, mediando intimidación e acceso carnal. 

A nova lei, segundo a Audiencia Provincial de Ourense, establece para ese precepto “un marco de 10 a 15 anos”, polo que os maxistrados salientan que “a pena a impoñer polo xogo da continuidade delituosa -12 anos e 6 meses- supera con moito a pena no seu día imposta -9 anos-”. 

O tribunal explica na resolución que a condena foi ditada en base á redacción do Código Penal vixente en 2010 e 2011, cando o acusado cometeu os feitos, e, polo tanto, anterior á reforma levada a cabo en 2015 pola LO 1/2015. Esa modificación, segundo destaca a sala, estableceu o límite de idade por baixo do cal o lexislador considerou que o consentimento non era libremente prestado nos 16 anos, fronte aos 13 que se prevía na redacción inicial. A Audiencia Provincial de Ourense sinala que, en base a iso, na sentenza na que condenou ao agresor sexual aplicou o artigo 179 do Código penal, “que prevía un marco punitivo de 6 a 12 anos, optando pola imposición da metade superior, aínda que na súa mínima extensión -9 anos-”. Contra a resolución da Audiencia Provincial de Ourense cabe presentar recurso de casación.