A Sala do Social do Tribunal Superior de Xustiza de Galicia (TSXG) decretou, do mesmo xeito que o Xulgado do Social número 3 de Vigo, que o contrato dunha técnica superior de actividades técnicas e profesionais-guía no Parque Nacional das Illas Atlánticas, que desempeñaba o seu traballo desde setembro de 2003 baixo a modalidade de interinidade por vacante, sen que a día de hoxe se cubrise a súa praza por parte da Xunta, sexa considerado indefinido, non fixo. O alto tribunal galego, por tanto, desestimou o recurso presentado pola Consellería de Medio Ambiente, Territorio e Vivenda contra a sentenza de primeira instancia.

O TSXG indica na resolución, contra a que cabe presentar recurso, que, tal e como indicou o Tribunal de Xustiza da Unión Europea o 19 de marzo de 2020, ha de considerarse como fraudulento “o feito de que as vacantes se dilaten no tempo sen que, en prazos razoables, se provexan as correspondentes convocatorias públicas de emprego”. Así, explica que nunha situación na que un empregado público nomeado sobre a base dunha relación de servizo de duración determinada –ata que a praza vacante para a que foi nomeado sexa provista de forma definitiva- ocupase, “no marco de varios nomeamentos ou durante un período inxustificadamente longo, o mesmo posto de traballo de modo ininterrompido durante varios anos” e desempeñase “de forma constante e continuada as mesmas funcións”, ha de ser considerada como “fraudulenta”, a condición de que “o mantemento de modo permanente do devandito empregado público nesa praza vacante débase ao incumprimento por parte do empregador da súa obrigación legal de organizar un proceso selectivo ao obxecto de prover definitivamente a mencionada praza vacante”. Contra a sentenza do TSXG cabe interpoñer recurso de casación.