A sección primeira da Audiencia Provincial da Coruña confirmou a pena de sete anos e medio de prisión (con límite de cumprimento de catro anos e medio) que o xuíz de primeira instancia lle impuxo ao empresario M.A. G.S., quen figuraba como titular da orquestra París de Noia desde o ano 1999, por cometer cinco delitos contra a facenda pública relativos aos impostos do IVE dos anos 2011-2012 e do IRPF de 2010-2012. Ademais, deberá aboar unha multa de 360.000 euros e unha indemnización á facenda pública de 1.192.873 euros.

A Audiencia, con todo, estimou en parte o recurso do empresario contra a sentenza do Xulgado do Penal número 1 da Coruña e suprimiu a condena de cinco meses de cárcere imposta pola comisión dun delito contable ao entender que queda absorbido pola defraudación tributaria, pois era a finalidade última do acusado.

O tribunal considera acreditado que o acusado, tras disolver a personalidade xurídica da orquestra París de Noia mediante a contratación das oficinas e sociedades do Grupo Lito, “obviou levar a preceptiva contabilidade mercantil, libros ou rexistros fiscais, escondendo os ingresos e gastos obtidos e sufridos respectivamente pola orquestra París de Noia”. O condenado, tal e como consta na resolución de primeira instancia confirmada pola Audiencia, mantivo a orquestra baixo a forma xurídica dunha comunidade de bens desde xaneiro de 1999 ata o 31 de xullo do 2008. A partir desa data, coa intención de eludir impostos, decidiu manter opaca a titularidade da París de Noia, “disolvendo a comunidade de bens e perdendo así a orquestra a súa personalidade xurídica”, polo que utilizou sociedades integradas no Grupo Lito para eludir o pagamento de tributos.