O Tribunal Superior de Xustiza das Illas Baleares é a máxima expresión do Poder Xudicial na comunidade autónoma. Constituíuse o 23 de maio de 1989 como órgano integrante da estrutura xudicial. Os Tribunais Superiores de Xustiza xorden da planta prevista no artigo 26 da Lei Orgánica do Poder Xudicial.

 É composto por: 

• Unha Sala de Goberno

• Tres Salas de Xustiza:
 
• Sala do Civil e Penal
• Sala do Contencioso-Administrativo
• Sala do Social.

A Sala de Goberno está constituída por: 

• O presidente do Tribunal
• Os presidentes das tres salas
• Os presidentes das audiencias provinciais
• Un número igual de maxistrados ou xuíces elixidos por todos os membros da carreira xudicial destinados na comunidade autónoma. Polo menos un deles debe ter a categoría de xuíz.

A Sala do Civil e Penal encárgase dos recursos de casación e revisión contra as resolucións dos outros órganos xurisdicionais do territorio en materia do dereito civil balear. Tamén se encarga das demandas de responsabilidade civil e causas penais contra os denominados aforados. Son aforados os membros do Goberno e da Asemblea lexislativa da comunidade autónoma e certos cargos xudiciais. Resolve ademais as apelacións nos asuntos da Lei do Xurado. 

A Sala do Contencioso-administrativo ocúpase dos recursos contra actos de administracións locais e da comunidade autónoma, cando este coñecemento non está atribuído aos xulgados contencioso-administrativos. Tamén resolve as apelacións contra as resolucións destes últimos e os recursos relacionados coas xuntas electorais, tanto provinciais como da comunidade autónoma. 

A Sala do Social encárgase dos recursos de súplica contra as resolucións dos Xulgados do Social do territorio, así como de cuestións de competencia que se susciten entre eles. 

O Tribunal Superior de Xustiza de Illes Balears ten a súa sede na Praza do Mercat, na antiga mansión de Can Berga. O Palacio de Xustiza Can Berga é un edificio de singular valor arquitectónico e está situado no centro da cidade. Toma nome da familia Berga á que pertenceu ata 1949. O edificio está  caracterizado polo seu amplo patio barroco. É sede compartida coa Audiencia Provincial de Palma.