O Tribunal Superior de Xustiza de Galicia (TSXG) suspendeu a obriga de prestar unha caución de 10.0000 euros a dúas asociacións -Asociación para a Defensa Ecolóxica de Galiza e Plataforma para la Defensa de la Cordillera Cantábrica- para facer efectiva a paralización cautelar da execución do parque eólico de Campelo, promovido por Greenalia entre Coristanco e Santa Comba, cuxas obras non empezaron. “Aínda que é certo que está acreditado que ningunha das dúas asociacións demandantes litiga amparada polo beneficio da xustiza gratuíta e que xa constituíron sen dificultade a caución, non é menos certo que unha das razóns principais para atender á suspensión foi a aparencia de bo dereito, suposto en que non é necesaria a constitución de caución algunha para asegurar os prexuízos", explica o TSXG no auto, no que tamén acordou rexeitar os recursos de reposición interpostos pola Xunta de Galicia e Greenalia contra a paralización cautelar do parque eólico. 

O auto impugnado, segundo indica o TSXG, "inclinouse por suspender a execución do parque eólico de Campelo, en parte porque non se acreditou a imperiosa necesidade de iniciar a súa construción, tendo en conta, por unha banda, que se emprazaría preto doutro parque eólico en funcionamento; e, por outro, porque levaba máis de once anos en tramitación, a pesar das recentes recomendacións impostas pola Comisión Europea aos estados membros para acelerar os trámites para a autorización dese tipo de instalacións". Contra a resolución non cabe interpoñer recurso.