O Xulgado do Contencioso-Administrativo número 1 de Ourense vén de condenar ao Concello desta cidade a aceptar a instalación dun ascensor na fachada dun edificio, coa consecuente ocupación do dominio público municipal.

Nunha sentenza pioneira, obrígase ao Concello a aplicar a normativa estatal de accesibilidade que, para dotar de ascensor a edificios de vivendas antigos que carecen del, permite en supostos excepcionais a construción do ascensor sobre chan público.

Trátase dun edificio de vivendas de cinco plantas, sen ascensor, no que reside xente maior con problemas de accesibilidade. O inmoble carece de patio interior, e para poder instalar o ascensor por dentro do edificio habería que realizar unha obra desproporcionadamente complexa, derrubando parte das vivendas. Dadas estas circunstancias, o maxistrado condena ao Concello a aceptar a opción de instalación do ascensor pola fachada exterior do edificio, sobre chan público. O fallo non foi apelado por ningunha das partes, polo que o mesmo é firme.