É un organismo creado coa aprobación dos Principios de Ética Xudicial para, con ocasión das consultas que recibe e mediante os seus ditames e informes, orientar sobre a interpretación destes principios.

Está composto por seis membros da carreira xudicial nomeados directamente por toda a carreira, quen nomea á súa vez a outro membro non xudicial, un académico experto en Ética ou Filosofía do Dereito.

Está garantida a confidencialidade das consultas e as opinións que emite nos seus ditames e informes teñen un carácter meramente indicativo.

O seu funcionamento é independente aos órganos de goberno do poder xudicial, aínda que o Consello Xeral do Poder Xudicial debe asegurar que a Comisión de Ética Xudicial estea dotada dos recursos e medios adecuados para o cumprimento dos seus obxectivos.

A actuación da Comisión non pode interferir no exercicio da potestade disciplinaria nin inxerir na determinación da responsabilidade civil ou penal dos xuíces e xuízas. Tampouco pode servir de referencia ou complemento nas actuacións tendentes a dirimir responsabilidades civís, penais ou disciplinarias, salvo que redunde en beneficio do interesado.

A Lei Orgánica 4/2018, do 28 de decembro, de reforma da Lei Orgánica 6/1985, do 1 de xullo, do Poder Xudicial, introduciu unha nova regra 24ª no artigo 560 que dispón o seguinte:

«Artigo 560.

1. O Consello Xeral do Poder Xudicial ten as seguintes atribucións: […]

24ª. A recompilación e actualización dos Principios de Ética Xudicial e a súa divulgación, así como a súa promoción con outras entidades e organizacións xudiciais, nacionais ou internacionais.

O asesoramento especializado aos xuíces e maxistrados en materia de conflitos de intereses, así como nas demais materias relacionadas coa integridade.

O Consello Xeral do Poder Xudicial asegurarase de que a Comisión de Ética Xudicial, que para ese efecto se constitúa, estea dotada dos recursos e medios adecuados para o cumprimento dos seus obxectivos.»