Nos boletíns estatísticos do CXPX incorporáronse no ano 2004 uns apartados específicos dedicados a obter...

Nos boletíns estatísticos do CXPX incorporáronse no ano 2004 uns apartados específicos dedicados a obter datos relativos aos procesos en materia de Violencia Domestica, á Orde de Protección e aos Procesos Civís derivados da Orde de Protección seguidos nos Xulgados con competencia en Familia. Posteriormente no ano 2005 foi necesario adaptar os Boletíns Estatísticos ás novidades introducidas na Lei Integral.

Coa creación dos novos Xulgados optouse pola elaboración dun Boletín novo, dedicado unicamente ao tema da violencia de xénero e que a partir do 29 de xuño de 2005 e cunha periodicidade trimestral deben remitir todos os Xulgados de Violencia sobre a Muller, con competencias exclusivas e con competencias compartidas ao Consello Xeral do Poder Xudicial para o seu tratamento estatístico.

A partir de xaneiro de 2006 introducíronse apartados específicos nos Boletíns dos Xulgados do Penal e das Audiencias Provinciais, co obxecto de poder contar con información da actividade destes órganos en relación coa violencia de xénero que regula a Lei Integral. Ademais no 2007 introducíronse novos datos que permiten aproximarse a aspectos que se consideraron precisados de medición, como o número de denuncias trimestrais que se interpoñen e o número de renuncias á continuación do proceso.

As estatísticas publícanse trimestralmente desagregadas por Tribunais Superiores de Xustiza, provincias e partidos xudiciais sobre denuncias, ordes de protección, medidas adoptadas, persoas axuizadas e forma de terminación dos procedementos.