A sección segunda da Audiencia Provincial de Pontevedra, de acordo co veredicto do Tribunal do Xurado, condenou a tres anos de cárcere como autor dun delito continuado de suborno a un funcionario da Subdelegación do Goberno en Pontevedra que en 2016 recibiu pagos pola tramitación de permisos de residencia. O tribunal tamén lle impuxo o pago dunha multa de 5.400 euros e sete anos de inhabilitación para emprego ou cargo público.

A sentenza sinala que o Tribunal do Xurado considerou que o sospeitoso, “durante a realización de funcións propias do seu traballo e sen ningún dereito, solicitou e recibiu das mulleres intervenintes nos expedientes cartos para a súa tramitación”. En concreto, unha das afectadas entregoulle 150 euros; e, a outra, 50. A Audiencia, que denegou a suspensión da pena privativa de liberdade, tamén condenou o imputado a devolver ás dúas mulleres os cartos que lle entregaron.