As XVI Xornadas Xurídicas de Sarria ‘Román García Varela’, que se celebrarán na Casa da Cultura da localidade os días 31 de maio, 1 e 2 de xuño, analizarán este ano os retos aos que se enfronta o Estado de Dereito. Na inauguración do encontro, que está organizado polo Concello de Sarria e que forma parte do programa de Formación Continua do Consello Xeral do Poder Xudicial (CXPX), intervirán o presidente do CXPX, p.s., o vogal Rafael Mozo; o alcalde de Sarria, Claudio Garrido; o vicepresidente segundo e conselleiro de Xustiza, Diego Calvo; o responsable de Promoción Económica e Social da Deputación de Lugo, Pablo Rivera; e a directora da UNED de Lugo, Ana Traseira. A conferencia inaugural será impartida pola presidenta do Consello Xeral da Avogacía, Victoria Ortega. 

Ao longo dos tres días, os/as expertos/as participarán en mesas redondas nas que analizarán, entre outras cuestións, as posibilidades de reforma do sistema tributario español; as cuestións xurídicas e éticas relacionadas coa eutanasia; ou as solucións que poden ofrecer aos problemas da Administración de Xustiza os Métodos Alternos de Solución de Conflitos (MASC), tales como a negociación, conciliación, a mediación ou a arbitraxe. As xornadas, que están dirixidas polo letrado da Administración de Xustiza Román García-Varela Iglesias e polo catedrático de Dereito Mercantil Carlos Lema Devesa, contarán coa presenza de prestixiosos relatores, entre eles maxistrados do Tribunal Supremo, expresidentes do Tribunal Constitucional e do Tribunal Superior de Xustiza de Galicia, a directora da Fábrica Nacional de Moeda e Timbre ou a presidenta da Comisión de Garantía e Avaliación da Eutanasia de Galicia. 

Ademais dos asistentes presenciais, entre eles xuíces e xuízas de diferentes localidades de España, as xornadas seguiranse de forma telemática desde outras comunidades autónomas e países como Perú ou Xapón polos máis de 200 estudantes que hai inscritos a través do centro de Lugo da Universidade Nacional de Educación a Distancia (UNED). 

As Xornadas Xurídicas de Sarria ‘Román García Varela’ tiveron a súa orixe en 2007 e, tras o falecemento do seu fundador, en 2013, continúan celebrándose anualmente en memoria do maxistrado. Esta XVI edición comezará o vindeiro mércores, 31 de maio, ás 9.30 horas. A clausura, que será o venres 2 de xuño ás 12 horas, contará coa asistencia de Pascual Sala Sánchez, expresidente do Tribunal Constitucional e do Tribunal Supremo e CXPX; José María Gómez y Díaz-Castroverde, presidente do TSXG; e os codirectores das xornadas, Román García-Varela Iglesias e Carlos Lema Devesa.