A Sala do Civil e Penal do Tribunal Superior de Xustiza de Galicia desestimou o recurso de apelación presentado polo home acusado de matar a súa ex parella e o mozo da muller no momento dos feitos nun monte da localidade de Arbo. A Sala conclúe que existe "proba de cargo que foi convenientemente avaliada polo Tribunal do Xurado".

Para os maxistrados, "as manifestacións testificales mostran a realidade da obsesión do acusado con quen fora a súa compañeira sentimental, a previsión deste de poder levar a cabo actuacións lesivas contra a propia muller e quen con ela estivese, o temor que xa tiñan os falecidos por ser seguidos e prever algún comportamento agresivo por parte do sospeitoso e, en definitiva, a localización do acusado no lugar dos feitos, a súa condición de experto cazador, a ausencia de coartada crible e de datos que determinen de modo inequívoco a errada apreciación efectuada polo Tribunal do Xurado". Desta maneira, o TSXG confirma a sentenza que o condena a 47 anos de prisión por dous delitos de asasinato.