O Xulgado de Instrución número 1 de Ribeira acordou sobreseer provisionalmente a causa que se segue pola desaparición de Diana Quer "por non existir no momento actual indicios suficientes para dirixir o presente procedemento fronte a persoa algunha determinada". A resolución xudicial aclara que é "necesaria a continuación da investigación de policía xudicial", xa que se atopan abertas varias liñas de traballo, e lembra que no caso de aparecer novos elementos, acordaríase a reapertura do proceso penal.

O maxistrado decidiu tamén alzar o segredo das actuacións. Entende que non cabe prorrogar esta medida, inicialmente acordada en agosto de 2016, xa que a considera "desproporcionada" unha vez que o resultado de escoitas practicadas foi incorporado á causa. Con todo, lémbrase no auto que esta decisión se toma "sen prexuízo do que do curso da investigación poida derivarse, podendo acordarse de novo o segredo de parte ou da totalidade das actuacións en caso de resultar necesario".