O Xulgado do Social número 3 de Ourense rexeitou a demanda presentada pola CIG contra Ambulancias do Sil, adxudicataria do servizo de transporte sanitario urxente na zona de Valdeorras-Verín-Lemos, na que solicitaba que a empresa realice aos seus empregados test de dobre banda mentres dure a pandemia do COVID-19.

A empresa, segundo a sentenza, facilitou aos traballadores máscaras, batas, monos e luvas. Igualmente, realizoulles test de dobre banda e todos deron negativo. Aínda que as probas xa foron practicadas, o sindicato solicita que se sigan facendo mentres dure a pandemia, polo que a titular do Xulgado do Social número 3 de Ourense rexeita a existencia de carencia sobrevinda de obxecto para rexeitar a demanda.

A xuíza destaca na resolución que non hai “ningunha lesión ou vulneración do dereito á integridade física por non realizar os test de dobre banda, ao non existir ningún tipo de normativa que impoña ás empresas o realizalos”. Así, sinala como “única obriga” o proporcionar os equipos de protección individual para evitar contaxios. “Neste caso, non se cuestionou de ningún xeito que non se fornecesen eses equipos, sendo significativo que durante máis de dous meses non houbese ningún contaxio, o que evidencia a súa calidade e a súa efectividade”.

Os test, segundo resalta a maxistrada, son efectivos só ata o día no que se realizan, polo que incide en que non son “un elemento de prevención ou protección, senón de detección”. Polo tanto, salienta que se deben reservar para aquelas persoas que presenten síntomas do COVID-19.