A vogal do Consello Xeral do Poder Xudicial e presidenta da Rede Europea de Consellos de Xustiza da Unión Europea, Nuria Díaz Abad, abordou nunha mesa redonda enmarcada na Escola de Verán do Poder Xudicial "as luces e sombras" do Tribunal de Xustiza da Unión Europea. A vogal expuxo nesta primeira xornada os factores a ter en conta no impacto da xurisprudencia do TXUE no Dereito interno e “a necesidade dunha relación fluída entre o Tribunal Europeo e os xuíces nacionais para o bo funcionamento da UE”. Outra das necesidades expostas foi que a resolución de asuntos importantes para un Estado membro se realice nunha sala composta por tres xuíces procedentes de Estados membros distintos.

Interveu a continuación Daniel Sarmiento, profesor titular de Dereito Administrativo e da Unión Europea da Universidade Complutense e antigo letrado do TXUE, quen afirmou que "o Tribunal de Xustiza da Unión Europea converteuse nun dos protagonistas indiscutibles do panorama xudicial". Para Sarmiento, "esta irrupción non é casual, senón o resultado dun lento pero constante proceso de familiarización dos xuíces e maxistrados españois coas ferramentas de comunicación do Tribunal de Xustiza". Segundo o profesor, a crecente importancia do TXUE débese ao aumento significativo de competencias asumidas pola Unión Europea durante os últimos anos. "O resultado é positivo, pois a xurisprudencia do Tribunal de Xustiza proporciona seguridade xurídica en todos os Estados membros e fortalece o cumprimento do Dereito da Unión en todo o seu territorio. Con todo, tamén provocou tensións, algunha crise e mesmo propostas de reforma como reacción aos problemas causados pola institución", afirmou.

Javier Borrego, ex xuíz do Tribunal Europeo de Dereitos Humanos e avogado do Estado ante o Tribunal de Contas, pronunciou a conferencia A globalización da Xustiza en España: o seu principio co Consello de Europa e o seu posible final. No seu relatorio tratou a orixe da comunicación e interdependencia entre os tribunais españois e os externos. Para este experto, a posición dos tribunais nacionais nesta realidade globalizada pode resumirse en catro posibles condutas: "somos mestres, alumnos, compañeiros ou simplemente pasamos". Borrego concluíu o relatorio cunha referencia á seguridade xurídica, "moi necesaria ante a globalización da Xustiza".

O primeiro curso da Escola de Verán celébrase no pazo de Mariñán (Bergondo) ata este venres.