A Sala Civil e Penal do Tribunal Superior de Xustiza de Galicia (TSXG) desestimou o recurso de apelación interposto polo octoxenario condenado a 20 anos de prisión por asasinar á súa muller na localidade de Narón (A Coruña), en decembro de 2015. Un xurado popular considerou probado que o acusado golpeou á súa muller e despois degolouna cun coitelo por detrás no domicilio familiar. Á hora de impoñer a pena, a presidenta do tribunal do xurado tivo en conta a circunstancia agravante de parentesco e a atenuante de anomalía psíquica leve, debido á ludopatía que padecía.

Ademais, dáse a circunstancia de que o acusado xa fora xulgado e condenado por estes mesmos feitos con anterioridade, pero, tras presentar recurso de apelación, o TSXG ordenou repetir o xuízo ao entender que non estaba suficientemente motivado o veredicto do xurado que entón tamén o consideraba culpable.