O Tribunal Superior de Xustiza de Galicia (TSXG) emitiu os seus dous primeiros autos sobre as medidas de prevención adoptadas pola Xunta como consecuencia da evolución da situación epidemiolóxica derivada da COVID-19. Neles, o alto tribunal galego ratifica as restricións implementadas polo Goberno galego en Verín e en determinadas rúas do municipio de Ourense o pasado 18 de setembro.

Trátase das primeiras resolucións ditadas pola Sala do Contencioso-Administrativo do Tribunal Superior despois da entrada en vigor, o pasado domingo 20 de setembro, da Lei 3/2020, que lle atribúe competencias para a autorización ou ratificación xudicial das medidas adoptadas polas autoridades sanitarias en ámbito distinto ao estatal. O TSXG ten a competencia sempre e cando impliquen a limitación ou restrición de dereitos fundamentais a destinatarios que non estean identificados individualmente.

Respecto das restricións que afectan a Ourense, o Superior indica que a Xunta achega un informe do subdirector xeral de Información de Saúde Pública no que dá conta da incidencia que a pandemia ten na comarca, con gráficos sobre as probas realizadas, porcentaxes de positivos e casos acumulados, tanto totais como por grupos de idade. Para finalizar, no informe, propón que se adopten as medidas nas vías municipais sinaladas, “por causa de que nesa zona residen grupos de persoas que teñen alta capacidade de transmisión debido á súa ocupación (na súa maior parte coidadores de maiores e traballadores da hostalería), así como polo seu modo de vida (alta interacción social)”.

A sección terceira da Sala do Contencioso-Administrativo subliña que, a pesar de que esa motivación non conta “co debido respaldo acreditativo”, a considera “suficiente” debido “aos altos intereses que a disposición persegue e o escaso sacrificio que produce a limitación grupal (que non confinamento)”.

Entre as limitacións establecidas pola Xunta nesas rúas de Ourense están a de limitar reunións privadas ata un máximo de cinco persoas e a prohibición de que bares e cafeterías poidan servir no interior.
En canto ás medidas adoptadas en Verín, o TSXG destaca que son “idóneas para a prevención e protección da saúde da poboación”, ademais de “necesarias, dada a constatación dunha situación de perigo actual e real para a saúde dos cidadáns, e proporcionadas ponderando os diferentes intereses en conflito”.

A Xunta adoptou o pasado 18 de setembro a decisión de incluír Verín no grupo de concellos con restricións. Entre as medidas adoptadas destacan a limitación ao 50% da capacidade nos establecementos comerciais, de restauración e hostalería, a limitación do número máximo de persoas nas reunións, tanto privadas como na vía pública, a un máximo de 10 persoas, así como a redución da asistencia permitida en celebracións, velorios e lugares de culto.