O Xulgado de Primeira Instancia número 1 da Coruña decretou que a entrega dos bens do pazo de Meirás que pertenzan á familia Franco debe facerse en presenza dunha comisión xudicial e das partes persoadas no procedemento, tomando como base o inventario elaborado en novembro de 2020. A familia Franco, tal e como estableceu o xulgado nun auto do pasado mes de xullo, non poderá retirar todos aqueles bens que nese momento reclamaron o Estado, a Xunta e os concellos da Coruña e Sada -excepto as alfombras dos corredoiros- porque o maxistrado entendeu que son bens inmobles, é dicir, inseparables do pazo. 

Ademais, a letrada da Administración de Xustiza indica no decreto, notificado onte, que para o traslado dos bens de interese cultural será necesario contar coa autorización da Xunta. 

Desta forma, o Xulgado de Primeira Instancia número 1 da Coruña acolleu en parte o recurso interposto polo Estado, a Xunta, o Concello de Sada, o Concello da Coruña e a Deputación Provincial da Coruña. Así, requiriu á familia Franco que permita aos profesionais designados o acceso ao inmoble.   

Na resolución, contra a que cabe interpoñer recurso, requírese ás partes para que no prazo de vinte días indiquen o tempo que previsiblemente consideran necesario para a práctica da dilixencia, así como para que identifiquen as persoas que intervirán e os medios que van ser empregados para a realización da entrega dos bens con seguridade