A Sala do Social do Tribunal Superior de Xustiza de Galicia (TSXG) celebrará o mércores 28 outubro, ás 9.30 horas, a audiencia sobre a solicitude de medidas cautelares previas 44/20, relativas ao Expediente de Regulación de Emprego (ERTE) da fábrica de Alcoa, situada en San Cibrao (Lugo). No procedemento figuran como demandantes tres sindicatos (CCOO, UGT e CIG) e, como demandados, Aluminio Español S.A. e Alcoa Inespal Coruña S.L.

A Consellería de Economía, Empresa e Innovación e o Ministerio de Industria, Comercio e Turismo interveñen no procedemento como partes interesadas. Para evitar os desprazamentos innecesarios á sede xudicial debido á crise sanitaria da COVID-19, a vista poderase seguir en directo a través de streaming.