Catorce anos de prisión para o acusado de dispararlle a súa exmuller nas Pontes (A Coruña)
Os maxistrados consideran probado que o procesado "non asimilou o divorcio decretado en 2015 e tentou en varias ocasións restablecer o contacto ou a relación coa súa exesposa"
- Autor
- Comunicación Poder Judicial
A Audiencia Provincial da Coruña condenou a catorce anos e nove meses de prisión o home que disparou a súa exparella na cabeza cunha pistola cando se atopaba dando un paseo pola zona do río nas Pontes.
A Sección Primeira imponlle un ano de prisión polo delito de acoso, seis meses por ameazas leves de xénero, once anos e nove meses polo delito de asasinato tentado e un ano e medio polo delito de tenencia ilícita de armas.
Os maxistrados consideran probado que o procesado "non asimilou o divorcio decretado en 2015 e tentou en varias ocasións restablecer o contacto ou a relación coa súa exesposa". Ante a negativa dela, desprazouse nun taxi ata a zona onde sabía que a vítima se atopaba cunha amiga e despois de dispararlle na cabeza deuse á fuga no mesmo vehículo.