O maxistrado do Xulgado do Contencioso-administrativo número 1 de Vigo desestimou a demanda interposta por un profesor de educación física dun Centro de Educación Infantil e Primaria (CEIP) de Vigo fronte á Consellería de Cultura, Educación e Ordenación Universitaria da Xunta de Galicia porque entendía que non resolvera de forma "expresa" as cuestións que lle expuña sobre as súas obrigas relacionadas coa atención a un alumno que ten diabetes.

O xuíz indica que as solicitudes de información por parte do demandante foron "puntualmente respondidas" pola Consellería, á vez que subliña que "o contido dos deberes de todos os que conforman a comunidade educativa en relación cos alumnos que padecen unha patoloxía crónica como é a diabetes, aparece nítidamente reflectido no protocolo autonómico e no especificamente elaborado en relación ao neno".

O titular do Xulgado do Contencioso-administrativo número 1 de Vigo tamén advirte ao demandante na sentenza sobre as responsabilidades "civís, disciplinarias ou penais" que puidese levar unha "inacción" ante unha emerxencia sanitaria. Ademais, lémbralle que pola súa condición de profesor de educación física ten "un deber especial de vixilancia" sobre o menor, pois o risco de hipoglicemia é maior ao practicar exercicio.