Galicia é a comunidade onde máis descendeu o número de execucións hipotecarias iniciadas no primeiro trimestre do ano. De xaneiro a marzo presentáronse 276, fronte ás 533 no mesmo período do ano anterior, o que supón un descenso interanual do 48,2%, fronte ao 29,8% de media estatal. Trátase da cifra máis baixa de execucións na comunidade desde 2007, segundo se desprende do informe "Efectos da crise económica nos órganos xudiciais" que hoxe fixo público a Sección de Estatística do Consello Xeral do Poder Xudicial.

O número de desaloxos practicados entre o 1 de xaneiro e o 31 de marzo de 2016 experimentou un descenso do 10,3% respecto ao mesmo período do ano pasado, ao pasar de 667 a 598, o que supón a cifra máis baixa desde polo menos 2013 (primeiro ano en que este dato se inclúe nas estatísticas). Destes, como consecuencia de procedementos de execución hipotecaria, producíronse 181 (fronte aos 205 de 2015) e como consecuencia de procedementos derivados da Lei de arrendamentos urbanos 399, a mesma cifra que o ano anterior, mentres que no conxunto do Estado os desaloxos por non pagamento de alugueiros descenden un 8,4%. Os desaloxos enmarcados na alínea doutras causas pasaron de 62 o ano pasado a 18 no primeiro trimestre de 2016.

Tamén descenderon os concursos presentados nos xulgados galegos. Fronte aos 101 que se rexistraron nos tres primeiros meses de 2015, pasouse a 96. Neste capítulo, debe terse en conta que, en virtude do cambio introducido pola modificación da Lei orgánica do poder xudicial que entrou en vigor o 1 de outubro de 2015, a competencia para os concursos das persoas naturais non empresarias pasou a corresponder aos xulgados de primeira instancia e instrución. Xa que logo, para o cálculo da evolución interanual dos concursos tívose en conta a suma dos concursos presentados nestes órganos xudiciais —7 no primeiro trimestre de 2016— e dos 89 presentados nos xulgados do mercantil. Atendendo aos presentados nestes últimos órganos xudiciais, trátase da cifra máis baixa desde 2008. Dos concursos presentados nos xulgados do mercantil foron declarados 72.

Con respecto aos expedientes do artigo 64 da Lei concursal, relativo á modificación substancial das condicións de traballo de carácter colectivo (ERE), en Galicia rexistráronse no primeiro trimestre do ano 12, fronte aos 24 do mesmo período do ano pasado, o que supón un descenso do 50%.

As 1424 demandas por despedimento presentadas nos Xulgados do Social entre o 1 de xaneiro e o 31 de marzo pasados supoñen un descenso interanual do 10,7%. Aínda que se trata da cifra máis baixa en Galicia desde 2008, o descenso nas demandas de despedimento en Galicia está por enriba da media estatal (-12,4%).

O informe sinala así mesmo un descenso dos procedementos monitorios presentados no primeiro trimestre do ano nos xulgados de primeira instancia e de primeira instancia e instrución. En Galicia presentáronse 7231 no primeiro trimestre, fronte aos 9132 do ano pasado, o que supón un descenso interanual de 20,8%.

Consulte os datos estatísticos correspondentes ao primeiro trimestre de 2016 e as series completas desde 2007 na seguinte dirección:

http://www.poderjudicial.es/cgpj/es/Temas/Estadistica-Judicial/Informes-estadisticos-periodicos