A violencia xuvenil centrou a xornada de hoxe da Escola de Verán do Poder Xudicial, que finaliza mañá no pazo de Mariñán (A Coruña). A dirección académica das clases correu a cargo do vogal do CXPX Juan Manuel Fernández Martínez. A maxistrada do Xulgado de Menores nº1 das Palmas de Gran Canaria, Reyes del Carmen Martel Rodríguez, profundou durante a súa intervención na xustiza restaurativa para os adolescentes que cometen delitos. Así, incidiu en que os principais obxectivos das medidas que se impoñen ao menor infractor deben ter en conta “a importancia de enfrontalo co que fixo”, así como “axudarlle a analizar as consecuencias para que poida aprender outras formas de interaccionar coa súa contorna”.

“O benestar da nosa sociedade depende, en gran medida, da nosa habilidade para preparar adolescentes suficientemente formados e con capacidade de axustes”, destacou. Martel, quen afirmou que, por iso, “cando falamos de adolescentes en situación de risco, poderiamos dicir que toda a sociedade o está”. A xustiza restaurativa é “unha oportunidade única de aprendizaxe” para os menores, segundo a xuíza, quen recentemente impuxo a algúns adolescentes como condena a realización do Camiño dos Valores, consistente en realizar rutas xacobeas, tanto por Canarias como por Galicia.

O médico psiquiatra director do Centro de Intervención en Violencia Filio- Parental (VFP) e presidente da Sociedade Española para o Estudo da VFP, Roberto Pereira Tercero, informou de que este fenómeno, traducido a denuncias xudiciais, tense incrementado “exponencialmente nos últimos anos”. A súa característica máis destacable, segundo o experto, é que a violencia non está causada por nenos ou mozos “problemáticos” como “toxicómanos ou pacientes psiquiátricos”, senón que se produce “nun contexto social aparentemente normalizado, con mozos violentos unicamente no contexto familiar, cunha particular relación cos seus pais ou coas figuras que ocupan o seu lugar”.

Este problema, en xeral, atribúese “á educación” e, aínda que é certo que nese aspecto a sociedade rexistrou “grandes cambios”, Pereira advertiu de que esa explicación é “insuficiente”. Así, asegurou que “ao déficit educativo” deben “unirse dificultades dos proxenitores, persoais ou na súa relación, xunto con características individuais dos mozos agresores”. A conxunción destes factores, segundo o experto, é a orixe da violencia filio-parental.

Na mesa redonda Unha sociedade atónita, ademais de Martel e Pereira, participou o fiscal de Menores da Fiscalía de Área de Jerez de la Frontera, Vicente de Juan Orlandis, quen examinou a resposta Penal fronte á violencia xuvenil.

O psicólogo do Tribunal Superior de Xustiza de Madrid e primeiro Defensor do Menor, Javier Urra Portillo, ofreceu o relatorio titulado Menores: vítimas e/ou verdugos. Durante a conferencia profundou nos principais problemas que asegura que sofren os adolescentes: a violencia de xénero, a falta de ilusión, o alcohol e a violencia filio-parental. O experto tamén advertiu sobre os perigos de compartir imaxes ou fotografías íntimas a través das redes sociais, á vez que criticou a educación diferenciada que, na súa opinión, dáse a nenos e nenas. “Desde que nace ao neno edúcaselle coa idea de que todo é para el, e a elas coa idea de que todo é para o outro, xa sexa o pai, a parella ou o fillo, e iso cambia a vida”, afirmou.