Os catro xulgados galegos de cláusulas chan recibiron desde o 1 de xuño máis de 2500 demandas relativas a litixios relacionados coas condicións xerais incluídas en contratos de financiamento con garantías reais inmobiliarias cuxo prestatario é unha persoa física.

O xulgado exclusivo de Vigo, Primeira Instancia nº14, é o que recibiu máis demandas: 1146 ata última hora de onte. O luns celebráronse as dúas primeiras audiencias previas e mañá celebraranse outras nove.

Na Coruña, desde o 1 de xuño, data de posta en funcionamento dos xulgados exclusivos, presentáronse 984 demandas e está previsto que a primeira audiencia previa se celebre o 25 de setembro. Do mesmo xeito que en Vigo, o Xulgado de Primeira Instancia nº7 da Coruña -seleccionado polo Consello para coñecer de maneira exclusiva na provincia destes asuntos- conta cun xuíz e tres funcionarios para facerse cargo do reforzo. Con respecto aos letrados da Administración de Xustiza, na Coruña foi asignada unha letrada en comisión de servizos e, en Vigo, aprobouse unha prolongación de xornada para a titular do órgano.

O Xulgado número 2 de Lugo recibiu ata o momento 90 asuntos. Neste xulgado hai un xuízo verbal sinalado para o 13 de setembro e varios ordinarios previstos para o 25 e 27 de setembro.

O xulgado exclusivo de cláusulas chan en Ourense é o Xulgado de Primeira Instancia nº4, tamén con competencia en Mercantil. Neste caso, o xulgado tamén foi reforzado cunha xuíza. Recibiron ata o momento 292 demandas.

Nas audiencias previas fíxase o obxecto do litixio, as partes propoñen proba e o xuíz admite as que considera procedentes para resolver o preito exposto. Se as partes propoñen só proba documental, o asunto quedaría xa visto para sentenza. En caso contrario, é necesaria a celebración de xuízo.

O pasado 1 de xuño púxose en marcha o plan de urxencia aprobado polo Consello Xeral do Poder Xudicial ante o previsible aumento de litixios sobre cláusulas abusivas en escrituras hipotecarias como consecuencia da sentenza do Tribunal de Xustiza da Unión Europea (TXUE) do 21 de decembro de 2016 en relación coas cláusulas chan.

O plan consiste na especialización de Xulgados de Primeira Instancia -un por provincia na península e un en cada unha das principais illas dos arquipélagos canario e balear-, que desde entón coñecen, de maneira exclusiva e non excluínte, dos litixios relacionados coas accións individuais sobre condicións xerais incluídas en contratos de financiamento con garantías reais inmobiliarias cuxo prestatario sexa unha persoa física.

Sentenzas

Desde a súa entrada en funcionamento como xulgados exclusivos, estes órganos ditaron varias sentenzas por achandamento da parte demandada, é dicir, cando a entidade bancaria acepta as pretensións do cliente. Só o xulgado de Lugo ditou polo momento sentencia resolvendo posturas atopadas entre as partes, ao existir oposición da entidade financeira. Achégase este fallo, correspondente a unha audiencia previa celebrada en xullo. A maxistrada condena á entidade a reintegrar aos demandantes as cantidades percibidas polo cobro indebido da cláusula chan, ademais dos correspondentes intereses, e se lle ordena tamén reintegrar aos clientes os gastos derivados do notario, rexistrador e xestoría, non así a devolución do pago no relativo aos gastos polo imposto de actos xurídicos documentados, xa “que aínda que non se contemplase na cláusula tería que satisfacer a demandante por disposición legal”.