A sección terceira da Sala do Contencioso-administrativo do Tribunal Superior de Xustiza de Galicia (TSXG) rexeitou o recurso interposto polo Consello Galego de Colexios Médicos no que solicitaba que se ordenase á Consellería de Sanidade a retirada do programa de citación denominado Xide (Xestión Integral da Demanda en Equipo), implantado a finais de 2021. Os maxistrados rexeitan na sentenza os motivos de nulidade esgrimidos pola demandante, os cales agrupa en tres: formais; de fondo ou contido; e transversal.

En canto aos formais, a Sala destaca que non se está en presenza dun regulamento, nin dunha disposición de carácter xeral, nin dunha circular ou instrución encamiñada a ordenar ou dirixir a actuación dos subordinados, “senón que se trata dun instrumento ou ferramenta que executa e emprega o persoal estatutario do Servizo Galego de Saúde para dar apoio eficaz á xestión asistencial, dirixida non a ese persoal, senón aos doentes, que son os seus destinatarios finais”. Os xuíces aseguran que “nada impedía que para a debida execución do Plan Galego de Atención Primaria para os anos 2019 a 2021 se puidese implantar programas como o de citación dos usuarios do sistema sanitario, como así se fixo, unha vez solicitados os informes internos e externos que obran no expediente administrativo”.

Para dar resposta ao segundo bloque, relativo ao contido, o alto tribunal galego indica que “a execución da programación de citas Xide polo persoal estatutario de servizos xerais nin é un triaxe, nin un sistema `encuberto´ de triaxe”. Así, salienta que “non vai encamiñado a valorar ou diagnosticar ao doente, función que tan só se encomenda ao persoal sanitario”.

Finalmente, os maxistrados explican na sentenza que o Consello Galego de Colexios Médicos denuncia que o programa carece de transparencia e que vulnera o dereito á confidencialidade dos datos médicos dos pacientes. A Sala destaca que a modernización do plan de citas “respondía á potestade de autoorganización para a mellor prestación do servizo asistencial de atención primaria, sen que para iso fose preceptivo solicitar un informe ou ditame concreto, aínda que se someteu o texto a un órgano asesor creado para o efecto, como foi o Consello Técnico de Atención Primaria”.

“O mesmo cabe indicar do que denomina falta de transparencia do algoritmo do programa, que non é senón un patrón ou documento de uso interno que recolle operacións básicas para a solución dun problema, neste caso mediante a recompilación de datos previamente definidos por un comité de expertos, sobre os motivos da consulta que interesa o doente, coa finalidade de facer máis eficaz o sistema de citación para que reciban asistencia a cargo de quen ten facultade para iso: o persoal sanitario”, recalca o TSXG na resolución, na que tampouco aprecia que se poña en risco a confidencialidade dos datos médicos dos pacientes, pois lembra que o doente “sempre pode pedir consulta telefónica, sen que estea obrigado a facelo de forma presencial, nin a facilitar datos ou información de índole sanitaria que non queira achegar, senón tan só o motivo da consulta para proceder á súa debida atención polos profesionais sanitarios, o que non só sucede coa asistencia primaria, senón tamén coa especializada e a de urxencia”. 

Ademais, lembra que a cidadanía ten dereito á confidencialidade dos datos que figuren nos ficheiros, sistemas e aplicacións das administracións públicas. Así, recalca que, para iso, “se lles impón a todos os empregados públicos, e singularmente ao persoal estatutario (sanitario ou non), a obriga de manter a debida reserva e confidencialidade da información que reciban dos usuarios”. A sentenza non é firme, pois contra ela cabe presentar recurso.