O Xulgado de Instrución número 4 de Cambados concluíu a investigación sobre os presuntos abusos sexuais cometidos en 2019 por un sacerdote que exercía como profesor de relixión no Colexio Salesianos de Vigo. A instrutora considera que existen “indicios de criminalidade bastantes” contra o encausado e ordena que se sigan os trámites de preparación para o xuízo por se os feitos fosen constitutivos de seis delitos de abusos sexuais sobre menores de dezaseis anos, tres deles continuados. A xuíza ordenou dar traslado ao Ministerio Fiscal e, no seu caso, á acusación particular, para que no prazo de dez días formulen os seus escritos de acusación solicitando a apertura do xuízo oral ou o sobresemento da causa, sen prexuízo de que excepcionalmente poidan pedir a práctica de dilixencias complementarias que consideren imprescindibles para realizar os seus escritos.

O sospeitoso presuntamente cometeu os feitos entre o 15 e o 23 de xullo de 2019, durante unhas convivencias que el mesmo dirixía e que estaban organizadas polo colexio, a través da asociación Abertal, nas instalacións dos Salesianos situadas en Cambados. A xuíza salienta no auto que “existen indicios” de que o investigado, “obrando coa finalidade de satisfacer o seu apetito sexual e de vulnerar a liberdade e indemnidade sexuais de persoas menores de dezaseis anos que tiña ao seu cargo”, levou a cabo “actos libidinosos consistentes en tocamentos no pene e xenitais” dos menores. A instrutora destaca que se prevaleceu “dunha situación de superioridade xerárquica, derivada do feito de ser sacerdote do colexio dos menores, profesor no mesmo e director do campamento xuvenil”.

O cura, segundo o auto, tamén abusou de dous menores durante unha peregrinación a Santiago de Compostela organizada polo colexio Salesianos de Vigo en abril de 2019. A un deles supostamente lle volveu a realizar tocamentos no campamento de Cambados. En xuño de 2019, segundo relata a instrutora, o sacerdote presuntamente abusou dun menor que acudiu á asociación xuvenil Abertal, dependente do Colexio Salesianos, a ver a final da Champions League.