A sección terceira da Sala do Contencioso-administrativo do Tribunal Superior de Xustiza de Galicia (TSXG) autoriza as medidas restritivas de dereitos fundamentais contidas na orde da Xunta de Galicia do 1 de setembro de 2021. A Sala asume “que pese ao avance da campaña de vacinación masiva da poboación, e mentres non se alcancen niveis de inmunización que protexan mesmo das novas variantes do virus, faise necesario seguir adoptando medidas preventivas e de control, orientadas a reducir a interacción social, que permitan garantir as máximas condicións de seguridade e reducir o risco de contaxio e propagación da  COVID- 19, medidas que son obxecto de seguimento e avaliación continua co fin de garantir a súa adecuación á evolución da situación epidemiolóxica e sanitaria”. 

O tribunal considera que as medidas solicitadas son “idóneas para a prevención e protección da saúde da poboación á que van destinadas, necesarias dada a constatación dunha situación de perigo actual e real para a saúde dos cidadáns, e proporcionadas ao fin que se pretende”. Polo que quedan situados ata as 00.00 horas do 18 de setembro nos niveis máximo e alto de restricións os seguintes concellos: Melide, Monforte, Ordes, Agolada, Arzúa, Lalín, O Pino, Trazo, Curtis, Cee, Cerceda, Muxía, Antas de Ulla, Monterroso, Palas de Rei, Vilalba, A Pastoriza, Castro de Rei, Meira, O Saviñao, A Pobra de Trives, Viana do Bolo, Ares e A Cañiza. Isto quere dicir que a permanencia de grupos de persoas en espazos pechados e en espazos abertos ou ao aire libre, sexan de uso público ou privado, quedará limitada aos constituídos exclusivamente por persoas conviventes entre a unha e as seis da mañá.