A Sección Segunda da Audiencia Provincial de Ourense desestimou a recusación presentada polo presidente da Deputación de Ourense, José Manuel Baltar Blanco, á que se adheriu a representación procesual do seu pai, José Manuel Baltar Pumar, fronte á titular do Xulgado de Instrución nº 3 de Ourense.

Entenden os maxistrados da Audiencia que "o que se pretende é apartar á instrutora coa finalidade de substituír o seu imparcial criterio por outro que se axuste máis aos subxectivos intereses das partes promoventes, e iso supón a falta de todo rigor no recurso que se utilizou e que por iso ten que ser rexeitado".

Desta forma, a maxistrada seguirá coñecendo do caso que no seu xulgado se segue polos delitos de acoso sexual, prevaricación e tráfico de influencias.