A Audiencia Provincial de Pontevedra condenou a un home a doce anos de prisión por un delito de asasinato en grao de tentativa tras considerar probado que atacou ao seu xenro cun machada coa intención de matalo. Os feitos producíronse en abril de 2015 na vivenda que ambos compartían, situada no Grove.

Como o acusado non quería que a súa filla, o marido desta e o seu fillo vivisen na mesma casa que el, decidiu agredir ao seu xenro cando este se atopaba cociñando, segundo se recolle na sentenza. Os maxistrados impóñenlle, ademais dos doce anos de prisión, a prohibición de comunicarse e aproximarse ao prexudicado durante un período de catorce anos.

A Sala condénao tamén a un ano de prisión por un delito de malos tratos no ámbito familiar por agredir á súa filla, que non sufriu lesión algunha. A sentenza recolle que ten que indemnizar ao seu xenro con 12 000 euros, con 2500 á súa filla e con 2000 ao seu neto, presente cando se produciron os feitos.