O Xulgado do Penal número 2 de Ourense absolveu dun delito contra os dereitos dos cidadáns estranxeiros e doutro de pertenza a organización criminal ao que en 2017 era presidente do Club de Fútbol Monterrei e a un avogado que asinou un contrato de representación e cesión de dereitos económicos e de imaxe cun futbolista mexicano. O xogador, segundo consta na sentenza, desprazouse a España en xullo de 2017 despois de que un antigo xogador do Burgos Club de Fútbol e representante de futbolistas contactase con el e, tras ensinarlle a forma de eludir a normativa española e da Unión Europea sobre control de fronteiras, lle ofrecese a oportunidade de xogar ao fútbol en España, así como a incorporación ao Burgos Club de Fútbol, “baixo falsas promesas de manutención, aloxamento e salario, que incumpriu”.     

Ao chegar a Burgos, o club condicionou a súa permanencia no equipo a que regularizase a súa situación legal en España, polo que a persoa que contactara con el, a cal non puido ser axuizada por atoparse en rebeldía, se comunicou co avogado que finalmente subscribiu o contrato de representación co xogador. O 31 de agosto de 2017, segundo a sentenza, o futbolista chegou a Verín, onde foi recollido polo presidente do Club de Fútbol Monterrei. 

“Non puido probarse que os acusados axudasen con ánimo de lucro ao xogador para permanecer en España vulnerando a lexislación sobre estancia de estranxeiros”, Salienta a xuíza na resolución, na que indica que a intervención dos investigados “se produciu con posterioridade á chegada a España do denunciante e tras fracasar a proposta de xogar no club de Burgos, que fora a determinante para o seu desprazamento a España”. Por iso, afirma que “queda totalmente vedada a posibilidade de apreciar o delito do artigo 313 do Código penal”, que castiga ao que determinara ou favorecera a emigración dalgunha persoa a outro país simulando contrato ou colocación, ou usando outro engano semellante. 

Ademais, en canto ao delito de pertenza a organización criminal que lles imputa a acusación particular, destaca que “resulta difícil poder concluír que houbese neste caso unha organización criminal para cometer delitos (en plural), constituída con carácter estable e onde de maneira concertada e coordinada se repartisen as tarefas ou funcións os diferentes membros da organización”. Contra a sentenza cabe presentar recurso.