Os órganos xudiciais galegos resolveron no terceiro trimestre do ano 100.682 asuntos, o que supón unha media de 392 causas por órgano xudicial, segundo se desprende do informe estatístico sobre a Situación dos órganos xudiciais difundido hoxe polo Consello Xeral do Poder Xudicial.

O número de asuntos ingresados neste período foi de 105.681, un 3% menos con respecto ao ano pasado. Do mesmo xeito que sucede nas estatística a nivel estatal, o número de asuntos recibidos descende en todas as xurisdicións menos en civil.

A taxa de pendencia situouse neste trimestre nun 1,44%, o que supón un descenso do 4,7% en comparación co mesmo trimestre de 2014.