A sección terceira da Sala do Contencioso-administrativo do Tribunal Superior de Xustiza de Galicia (TSXG) avalou nun auto notificado hoxe a restrición ás agrupacións de persoas en toda Galicia aprobada pola Xunta o pasado 14 de outubro como consecuencia da evolución da situación epidemiolóxica derivada da COVID-19. O TSXG, polo tanto, ratificou a orde da Consellería de Sanidade que limita as reunións a dez persoas.

A Sala tamén aprobou as medidas restritivas de dereitos fundamentais aprobadas polo Goberno galego o pasado 14 de outubro como consecuencia da evolución da pandemia nos municipios de Vilagarcía de Arousa, Vilanova de Arousa, Sanxenxo, Meis e Cambados, así como no Concello de Lugo e nas comarcas de Santiago, Allariz-Maceda, O Carballiño, Ourense, O Ribeiro, Terra de Celanova, Valdeorras e Verín.